ნატო მზად არის მაკედონიის მისაღებად, როგორც კი მოგვარდება უთანხმოება სახელწოდების გარშემო
ნატოს გენერალური მდივნის, იენს სტოლტენბერგის განცხადებით, ალიანსი მზად არის, თავის 30-ე წევრად მიიღოს მაკედონია, როგორც კი მოგვარდება სახელწოდების გარშემო საბერძნეთთან მისი უთანხმოება. ეს განცხადება სტოლტენბერგმა გააკეთა 6 სექტემბერს მაკედონიაში ვიზიტისას. ქვეყანაში, რომელიც წინათ ყოფილი იუგოსლავიის შემადგენლობაში შედიოდა, 30 სექტემბერს გაიმართება რეფერენდუმი სახელწოდების შეცვლის შესახებ. ამ ქვეყნისა და საბერძნეთის საგარეო საქმეთა მინისტრებმა ივნისში ხელი მოაწერეს შეთანხმებას სახელწოდების „ჩრდილოეთ მაკედონიად“ გადაკეთების შესახებ, რათა მოგვარდეს სკოპიესა და ათენს შორის მრავალწლიანი უთანხმოება, რომელიც აფერხებდა ნატოსა და ევროკავშირში ქვეყნის გაწევრიანებას. მაკედონიის პარლამენტმა უკვე მხარი დაუჭირა კანონპროექტს სახელწოდების შეცვლის შესახებ.