მიხეილ ბატიაშვილი: „მოჭიდავეები მუდმივად გვანებივრებდნენ გამარჯვებებით“

„აღფრთოვანებული ვარ თქვენი შრომისმოყვარეობით და იმ წარმატებით, რომელიც მსოფლიოს ჩემპიონატზე მოიპოვეთ” – უთხრა მიხეილ ბატიაშვილმა მსოფლიოს ჩემპიონატიდან დაბრუნებულ ქართველ მოჭიდავეებს. განათლების, მეცნიერების, კულტურისა და სპორტის მინისტრმა მოადგილეებთან და პარლამენტის სპორტისა და ახალგაზრდულ საქმეთა კომიტეტის თავმჯდომარე მიხეილ ყაველაშვილთან ერთად უმასპინძლა სამინისტროში ჭიდაობის ეროვნული ფედერაციის ხელმძღვანელობას და თავისუფალი სტილით მოჭიდავეთა ნაკრებების წევრებს.


„საქართველოში ჭიდაობა ყოველთვის იყო და იქნება ქართული სპორტის ერთ-ერთი წამყვანი სახეობა. მოჭიდავეები მუდმივად გვანებივრებდით გამარჯვებებით საერთაშორისო სარბიელზე და მიხარია, რომ ეს სასიამოვნო ტრადიცია გრძელდება. ეს წარმატება სამინისტროსა და ჭიდაობის ფედერაციის ერთობლივი, მიზანმიმართული მუშაობის და პირველ ყოვლისა მწვრთნელთა გუნდის მაღალპროფესიული საქმიანობის შედეგია“ - განაცხადა მიხეილ ბატიაშვილმა.


მსოფლიოს 2018 წლის ჩემპიონატს 20-28 ოქტომბერს ბუდაპეშტმა უმასპინძლა და საქართველოს თავისუფალი და ბერძნულ-რომაული სტილით მოჭიდავეთა ნაკრებებმა სულ 6 მედალი მოიპოვეს - 1 ოქრო, 1 ვერცხლი და 4 ბრინჯაო.