ბრიუსელში გაიმართა საქართველო-ევროკავშირის ასოცირების საბჭოს მე-5 სხდომა
ბრიუსელში გაიმართა საქართველო-ევროკავშირის ასოცირების საბჭოს მე-5 სხდომა, რომელშიც მონაწილეობა მიიღეს ევროკავშირის საგარეო-პოლიტიკურმა ლიდერმა,ფედერიკა მოგერინიმ, ევროკომისარმა გაფართოებისა და სამეზობლო პოლიტიკის საკითხებში, იოჰანეს ჰანმა და საქართველოს პრემიერ-მინისტრმა, მამუკა ბახტაძემ. ოფიციალური პროგრამით, საბჭოს უნდა შეეფასებინა პროგრესი ევროკავშირთან ასოცირების შეთანხმების და ღრმა და ყოვლისმომცველი ვაჭრობის შეთანხმების შესრულების პროცესში.
„საქართველომ მნიშვნელოვანი ნაბიჯები გადადგა ასოცირების ხელშეკრულების დანერგვის თვალსაზრისით, რაც ქმნის საფუძველს ჩვენი პოლიტიკური კავშირებისთვის და ეკონომიკური ინტეგრაციისთვის. ევროკავშირი დიდ ძალისხმევას ახმარს ჩვენი პარტნიორობის სრული პოტენციალის გამოკვლევას, მათ შორის ექსპორტისა და ზრდის პოტენციალის, რომელსაც გვთავაზობს ღრმა და ყოვლისმომცველი თავისუფალი ვაჭრობის სივრცე“ - განაცხადა ფედერიკა მოგერინიმ, რომელმაც ასევე აღნიშნა, რომ საქართველოში ჩატარებული საპრეზიდენტო არჩევნების შემდეგ მნიშვნელოვანია დიალოგი, რათა გადაილახოს პოლიტიკური პოლარიზაცია.
„დღეს ჩვენი ფოკუსის საგანი იყო ინკლუზიური პოლიტიკური გარემოს მნიშვნელობა და თავისუფალი, დამოუკიდებელი მედიის ხელშეწყობის აუცილებლობა, კანონის უზენაესობის და სასამართლოს დამოუკიდებლობის პატივისცემა. ევროკავშირი გააგრძელებს საქართველოს მხარდაჭერას ამ სფეროებში, განსაკუთრებით უზენაესი სასამართლოს მოსამართლეთა არჩევის კრიტერიუმების საკითხთან მიმართებით“ - თქვაიოჰანეს ჰანმა.
„პოზიტიურ საკითხებთან ერთად, განვიხილეთ რუსეთის ფედერაციის მიერ საქართველოს ტერიტორიების კვლავინდებური ოკუპაციის საკითხი, კონფლიქტის მშვიდობიანი გადაწყვეტის მნიშვნელობა და ჩვენი პასუხი ადამიანის უფლებების მძიმე დარღვევებზე, რაც ოკუპირებულ ტერიტორიებზე ხდება, ჩვენი მოქალაქეების სასტიკი მკვლელობის ჩათვლით. განვიხილეთ ახალი სამშვიდობო ინიციატივა, ‘ნაბიჯი უკეთესი მომავლისკენ’, და მისი განხორციელებისთვის ჩვენი ერთობლივი ძალისხმევის მნიშვნელობა“ - განაცხადა მამუკა ბახტაძემ.