იაკუტიაში დაარბიეს შუააზიელების კუთვნილი ობიექტები გაუპატიურებაში ყირგიზი კაცის დადანაშაულების შემდეგ
რუსეთის ფედერაციაში შემავალ რესპუბლიკა სახაში (იაკუტია) შუააზიელების კუთვნილი ობიექტების დარბევა მოჰყვა დემონსტრაციებს, რომლებზეც გააპროტესტეს ადგილობრივი ქალის გაუპატიურება. პოლიციამ ეჭვმიტანილად დაასახელა ყირგიზი კაცი.
შეჩერებულია ავტობუსების მოძრაობა და ყირგიზ მიგრანტებს მოუწოდებენ, ნუ გავლენ შინიდან.
რეგიონის დედაქალაქ იაკუტსკში, რომელიც მოსკოვის აღმოსავლეთით 4900-მდე კილომეტრში მდებარეობს, ვითარება 19 მარტსაც დაძაბული იყო მას შემდეგ, რაც წინა დღეს 5000-მდე ადამიანი შეიკრიბა აქციაზე დამნაშავის დასჯისა და შუა აზიის ყოფილი საბჭოთა რესპუბლიკიდან იმიგრაციის შეზღუდვის მოთხოვნით.
ყირგიზმა ქალმა სახელად ილდიზმა, რომელმაც თავისი გვარის საჯაროდ გამხელა არ მოისურვა, რადიო თავისუფალი ევროპა/რადიო თავისუფლებას უთხრა, რომ ძალადობის შიშით აღარ მიდის ბაზარში სამუშაოდ. მისი თქმით, ყირგიზები შეადგენენ ბაზარში დასაქმებულების 80%-ს.