მიხეილ სააკაშვილის ადვოკატი: სააკაშვილს უფლება აქვს ჩავიდეს უკრაინაში
საქართველოს მესამე პრეზიდენტის მიხეილ სააკაშვილის ადვოკატის რუსლან ჩერნოლუცკის ინფორმაციით, მიხეილ სააკაშვილს აქვს სრული უფლება ჩავიდეს კიევში და მონაწილეობა მიიღოს იმ საგამოძიებო მოქმედებებში, რომელიც მის წინააღმდეგ არის აღძრული.
რუსლან ჩერნოლუცკის განცხადებით, რომელიც მან 21 მარტს საკუთარ ფეისბუქის გვერდზე გამოაქვეყნა, უკრაინის უსაფრთხოების სამსახურმა პირველ მარტს განაახლა გამოძიება მიხეილ სააკაშვილის საქმეზე.
გამოძიების განახლების შემდეგ კი რუსლან ჩერნოლუცკის თქმით, მიხეილ სააკაშვილს აქვს სრული უფლება ნებაყოფლობით ჩავიდეს უკრაინაში, რათა მასთან თანამშრომლობით განხორციელდეს წინასასამართლო გამოძიება და პროცესუალური მოქმედებები:
„სამართალდამცავმა ორგანოებმა დაუყოვნებლივ უნდა შეუშვან ეჭვმიტანილი უკრაინის ტერიტორიაზე, რათა მან ნებაყოფლობით მიიღოს მონაწილეობა საქმის გამოძიებაში“, - წერს ადვოკატი.
საუბარია უკრაინაში ხელისუფლების ხელში ჩაგდების მცდელობის საქმეზე, რომელზეც გამოძიება 2018 წლის 6 მარტს შეწყდა.