რომან გოცირიძე: თიბისი ბანკის საქმეს შესაძლოა ვუწოდოთ ანაკლიის პორტის საქმე
„როგორც ვატყობ, თიბისი ბანკთან ნაკლებად გვაქს საქმე. შეგვიძლია, რომ თიბისი ბანკის საქმის ნაცვლად, ამ საქმეს ანაკლიის პროექტის საქმე ვუწოდოთ“, - ასე ეხმაურება რომან გოცირიძე, „ნაციონალური მოძრაობის“ წევრი, ინფრასტრუქტურის მინისტრის, მაია ცქიტიშვილის გამოსვლას პარლამენტში ანაკლიის პორტის გარშემო განვითარებულ მოვლენებზე.
რომან გოცირიძე თვლის, რომ ანაკლიის პორტის პროექტის განხორციელებას სახელმწიფო უშლის ხელს:
„მინისტრის დღევანდელი გამოსვლის შემდეგ შეგვიძლია დავასკვნათ, რომ ანაკლიის პროექტი არის სერიოზული საფრთხის ქვეშ და ეს საფრთხეები, პირველ რიგში, მოდის ხელისუფლების მხრიდან. დიდი ალბათობით, 100%-იანი ალბათობით შეიძლება ვთქვათ, რომ ანაკლიის პროექტი თავის ვადაში ვერ ჩაეტევა. ანაკლიის პროექტის ვადის გადაწევის ხანგრძლივობა, აბსოლუტურად გაურკვეველია. ეს შეიძლება იყოს ერთი წელი, ორი, ხუთი და შესაძლოა, ეს იყოს ამ პროექტის ჩაშლაც. ვერ მივიღეთ პასუხი კითხვაზე, დღევანდელმა ინვესტორმა რომც გააგრძელოს საქმიანობა, როდის მოესწრება ამ პროექტის პირველი ფაზის დამთავრება?“
პარლამენტის პლენარულ სხდომაზე ინფრასტრუქტურის მინისტრს მაია ცქიტიშვილს უსმენენ. ის პარლამენტში ანაკლიის პორტის გარშემო განვითარებული მოვლენებზე სასაუბროდ საკუთარი ინიციატივით მივიდა.