ერთიანი ნაციონალური მოძრაობა ახალი თავმჯდომარის ასარჩევად ყრილობას მართავს
24 მარტს, „ერთიანი ნაციონალური მოძრაობის“ ყრილობა გაიმართება, სადაც პარტიის თავმჯდომარის თანამდებობაზე გრიგოლ ვაშაძის კანდიდატურას უყრიან კენჭს.
ენმ-ს თავმჯდომარის პოსტზე გრიგოლ ვაშაძის კანდიდატურის მხარდაჭერასთან დაკავშირებით ვიდეო-მიმართვაში საქართველოს მესამე პრეზიდენტმა მიხეილ სააკაშვილმა ისაუბრა, სადაც ასევე თქვა, რომ ნაციონალური მოძრაობა" ფართო ოპოზიციურ გაერთიანებასთან ერთად ქვეყნის გადარჩენაზე და ქვეყნის მმართველობაზე პასუხისმგებლობის ასაღებად ემზადება.
მიხეილ სააკაშვილმა 18 მარტს გავრცელებულ ვიდეო მიმართვაში აღნიშნა, რომ მას არ ეძლევა ქვეყანაში შემოსვლის საშუალება, რაც დამაბრკოლებელი ფაქტორია პარტიულ საქმიანობაში. მისივე განმარტებით, ბოლო საპრეზიდენტო არჩევნებმა კარგად აჩვენა გაერთიანებული ოპოზციის ერთიანი კანდიდატის, გრიგოლ ვაშაძის პოტენციალი. თუმცა საქართველოს მესამე პრეზიდენტი აცხადებს, რომ მიუხედავად მისი პირადი სიმპატიებისა, ახალი ლიდერი პარტიამ საყოველთაო კენჭისყრით უნდა აირჩიოს.
პარტიაში აცხადებენ, რომ გრიგოლ ვაშაძის კანდიდატურის ირგვლივ მსჯელობა პარტიაში კარგა ხანია მიმდინარეობდა. ყრილობა 14:45 საათზე, სასტუმრო „ბილტმორში“ გაიმართება.