ე.წ. სამხრეთ ოსეთში საპარლამენტო არჩევნები 9 ივნისს დაინიშნა

ე.წ. სამხრეთ ოსეთში წინასაარჩევნო სეზონი გაიხსნა - ცნობილია საპარლამენტო არჩევნების თარიღიც -  9 ივნისი, კვირა.

შესაბამის ბრძანებას უკვე მოაწერა ხელი დე ფაქტო პრეზიდენტმა ანატოლი ბიბილოვმა და წინასაარჩევნო კამპანიაც გახნილად გამოაცხადა.

საპარლამენტო არჩევნები მაჟორიტარულ-პროპორციული სისტემით ჩატარდება.

ე.წ. სამხრეთ ოსეთში ოფიციალურად ათი პოლიტიკური პარტიაა დარეგისტრირებული, რომელთაც არჩევნებში მონაწილეობის უფლება აქვთ.

„ეხო კავკაზას“ ცხინვალელი კორესპონდენტის, მურატ კუგამეხოვის ცნობით, ის კანდიდატები, რომლებიც მედიაში ხშირად არ ჩანან, პრობლემის წინაშე დადგნენ: თებერვლის ბოლოს, მმართველი პარტიის „ერთიანი ოსეთის“ ინიციატივით, მედიაში წინასაარჩევნო აგიტაციის ვადის ხანგრძლივობა  პარლამენტში მოხვედრის მოსურნე დეპუტატებისათვის 30-დან 20 დღემდე შემცირდა.

ადგილობრივი კანონმდებლობით ასევე შეზღუდულია საარჩევნო ხარჯების რაოდენობაც - პოლიტიკურმა პარტიამ წინასაარჩევნო პერიოდში ექვს მილიონ რუბლზე მეტი არ უნდა დახარჯოს, მაჟორიტარი კანდიდატის ხარჯებმა კი ერთ მილიონ რუბლს არ უნდა გადააჭარბოს.

ამ არჩევნებისთვის კანონში შესულია შესწორება, რომლის თანახმად, არჩევნებში მონაწილეობის უფლება არა აქვთ ალკოჰოლიკებს, ნარკოდამოკიდებულ და ფსიქიკური ჯანმრთელობის პრობლემების მქონე ადამიანებს.

არჩევნებში მონაწილე ყველა კანდიდატი ვალდებულია წერილობითი თანხმობა წარუდგინოს ცენტრალურ საარჩევნო კომისიას მისი პირადი მონაცემების წვდომაზე, რითიც შემოწმდება თუ რამდენი ხნის განმავლობაში არ იმყოფებოდ  ე.წ. სამხრეთ ოსეთის ტერიტორიაზე.

ამ დღეების რაოდენობა 93-ს არ უნდა აღემატებოდეს.