ჩეხეთის პრემიერი აცხადებს, რომ ბრალის წაყენების შემთხვევაში არ გადადგება
ჩეხეთის პრემიერ-მინისტრმა, ანდრეი ბაბიშმა 20 აპრილს განაცხადა, რომ არ გადადგება იმ შემთხვევაშიც, თუკი მას ბრალს წაუყენებენ ევროკავშირის მიერ სუბსიდიის სახით გამოყოფილი ორი მილიონი ევროს მითვისების საქმეზე.
პოლიცია 17 აპრილს გამოვიდა რეკომენდაციით ბაბიშისთვის ბრალის წაყენების თაობაზე საქმეზე, რომლის გამოც ბაბიშს და კიდევ რამდენიმე პირს, მათ შორის მისი ოჯახის წევრებს, შესაძლოა ხუთიდან ათ წლამდე პატიმრობა მიესაჯოთ.
"არ გადავდგები, რადგან, როგორც თავიდანვე ვამბობდი, ეს პოლიტიკური პროცესია" - უთხრა ბაბიშმა მის მფლობელობაში არსებულ გაზეთ "დნესს".
საქმე ეხება ფერმას, რომელმაც ევროკავშირის სუბსიდია მიიღო მას მერე, რაც მისი მფლობელი შეიცვალა, ბაბიშის კუთვნილი კონგლომერატის, 250-დე კომპანიისგან შემდგარი "აგროფერტიდან" ბაბიშის ოჯახის წევრებზე. სუბსიდიები განკუთვნილი იყო საშუალო და მცირე ზომის ბიზნესებისთვის და "აგროფერტი" მათ ვერ მიიღებდა. მოგვიანებით, "აგროფერტი" ისევ გახდა ფერმის მფლობელი.
ბაბიში, პოპულისტური ორიენტაციის მილიარდერი, უარყოფს ყველანაირ დანაშაულს.