ლევან ახვლედიანი: ვეცდებით, ანაკლიის პორტის მშენებლობის ვადამ არ გადაიწიოს
"ყველაფერს გავაკეთებთ, რომ ანაკლიის პორტის მშენებლობის ვადები მაქსიმალურად დაცული იყოს, თუმცა ფინანსური დახურვის ვადამ შესაძლოა, გადაიწიოს", - უთხრა ჟურნალისტებს „ანაკლიის განვითარების კონსორციუმის“ გენერალურმა დირექტორმა ლევან ახვლედიანმა სასტუმრო „რედისონში“ ანაკლიის პორტის საინვესტიციო ხელშეკრულების თაობაზე გამართული სამმხრივი შეხვედრის დასრულების შემდეგ.
ახვლედიანის განცხადებით, საჭიროა დამატებითი მოლაპარაკებები, ამიტომ, ფინანსური დახურვის ვადა, რომელიც 15 ივნისამდე იყო განსაზღვრული, გადაიწევს.
"შევთანხმდით, რომ მაქსიმალურად მოქნილები ვიქნებით ფინანსური დახურვისა და მოლაპარაკებების ვადებთან დაკავშირებით. ვერ გეტყვით, კონკრეტულად როდის დაიწყება მშენებლობა, მაქსიმალურად ყველაფერს ვაკეთებთ, რომ ვადები დავიცვათ", - განაცხადა ლევან ახვლედიანმა.
ის ასევე გამოეხმაურა მთავრობის პოზიციას იმის თაობაზე, რომ მთავრობა პროექტის კომერციულ რისკებს არ დააზღვევს.
"ანაკლიის პორტის პროექტი კომერციულად გამართულია, ტვირთბრუნვის პროგნოზიც ძალიან დადებითია. აქ არის საუბარი გარკვეულ რისკებზე, რომელიც დადებით თუ უარყოფით პროგნოზებთან კავშირში არ არის", - განაცხადა ლევან ახვლედიანმა.