მონსტრი და ტურისტების მაგნიტი - NYT სტალინის სახლ-მუზეუმზე წერს
„სტალინი კარგად მღეროდა. ლექსებს წერდა. 9 ათასი სახელმწიფო საწარმო გახსნა“ - ძირითადად ასეთ ფაქტებს აცნობენ დამთვალიერებლებს გორში, სტალინის სახლ-მუზეუმშიო - წერს ავტორიტეტული ამერიკული გამოცემა New York Times მოზრდილ სტატიაში, სადაც საქართველოში საბჭოთა ლიდერის მიმართ არაერთგვაროვან დამოკიდებულებაზეა ლაპარაკი.
ავტორის ცნობით მუზეუმში ყვებიან ღარიბი ბიჭს ისტორიას, რომელმაც რუსეთის იმპერატორის ციხეებში არაერთი ტყვეობის მიუხედავად მოახერხა და ძალაუფლების უმაღლეს მწვერვალს მიაღწია. ტურის დროს არ ახსენებენ არც გულაგებს და 1930-იანი წლების დიდ ტერორს.
გამოცემა სტალინის მუზეუმის საკითხს უფრო ფართო ჭრილში განიხილავს და წერს, რომ საქართველო ცდილობს გაერკვეს, თუ რას ნიშნავს სტალინის მემკვიდრეობა და როგორ შეიძლება ამის მარკეტინგი ტურისტებისათვის. ავტორი იხსენებს ტურიზმის ყოფილი შეფის, გიორგი სიგუას 2012 წლის სიტყვებს: სტალინს, როგორც ტურისტულ პროდუქტს, ჩინეთში კარგად გავყიდით. ისევე, როგორც ებრაელები ყიდიან იესო ქრისტესო. იქვე აღნიშნულია, რომ სიგუა შემდეგ წელს გადააყენეს და საქართველომაც უარი თქვა „სტალინზე დაფუძნებული ტურიზმის“ პოლიტიკაზე, თუმცა ბელადი სამშობლოში მართლაც ბევრ ჩინელსა და რუსს იზიდავს. გორში მდებარე სახლ-მუზეუმის თანამშრომლის ცნობით - წელიწადში დაახლოებით 162 ათას ადამიანს.
ეს ოფიციალური სტატისტიკა არ არის. ავტორი წერს, ოფიციალურმა პირებმა სტალინთან დაკავშირებულ ტურიზმზე ჩვენს არც ერთ შეკითხვას არ უპასუხეს. ეს სენსიტიურობა გასაგებია, რადგან სტალინის სახელი საქართველოში შერეულ ემოციებს იწვევს. ზოგი პატივს სცემს, სხვები ლანძღავენ, ბევრი გორელისთვის კი მისი სახელი შემოსავლის წყაროაო.
New York Times იხსენებს, 2012 წელს კულტურის სამინისტრომ მუზეუმს მოთხოვა, რომ სტალინით აღფრთოვანებული ტონისთვის მოეკლოთ და დაემატებინათ ექსპონატები, რომლებიც ბელადის მსხვერპლებსაც მიაგებდა პატივსო. მუზეუმმა პასუხად ერთი ოთახი დაამატა, სადაც დაკითხვების დროს გამოყენებული მაგიდა დგას და საკნის რეპროდუქცია შექმნა. „გულგრილი და უგულო დამატებაა“ - წერს ავტორი - „და, რაც მთავარია, ტურის დროს მას ხშირად გამოტოვებენ ხოლმე“.
ავტორი სტატიას მუზეუმის ერთ-ერთი დამთვალიერებლის, გერმანელი ტურისტის რეაქციის ასრულებს. ტურის ბოლოს ის გაოცებული ამობს: „ის აქ გმირია! საქართველოში ძალიან ცნობილი მწერლები ყავთ, რომლითაც ყველა ამაყობს. მგონი არ ესმით, რომ სტალინმა ყველას მათ გულაგში უკრა თავი და დახოცა.“
New York Times-ის სტატიის ხიბლი დიდწილად ფოტოებიცაა, რომელიც მას ახლავს. მათი ავტორი დარო სულაკაური გახლავთ. მან დიდსულოვნად დაგვრთო უფლება გამოგვეყენებინა გორში გადაღებული ფოტოები მისი პირადი არქივიდან.