მამუკა ხაზარაძეს აქვს რესურსი საზოგადოებაში „დამცველის“ იმიჯი შეიქმნას – დრო და ნიშა ახლა მისთვის ძალიან ხელსაყრელია

ის პოლიტიკური ძალა იქნება წარმატებული, რომელიც შეძლებს, რომ საზოგადოებაში გააჩინოს მათი დამცველის იმიჯი, თუნდაც „ნაციონალური მოძრაობისგან“ და თუნდაც პოლიტიკური რყევებისგან. ხაზარაძეს ამის რესურსი აქვს, – ამის შესახებ ექსპერტმა ხათუნა ლაგაზიძემ „ინტერპრესნიუსს“ განუცხადა, რითაც გამოეხმაურა მამუკა ხაზარაძის გადაწყვეტილებას საზოგადოებრივი მოძრაობის შექმნის თაობაზე.

ლაგაზიძის შეფასებით, ხაზარაძეს შეუძლია, რომ მოსახლეობას ძალიან სწორი და კარგი ეკონომიკური ხედვა შესთავაზოს.

პოლიტოლოგის თქმით, ქვეყანაში დრო და ნიშა ახლა ხაზარაძისთვის ძალიან ხელსაყრელია.

„იმას, თუ რა შანსები აქვს მამუკა ხაზარაძეს და მის სამოქალაქო მოძრაობას, დიდწილად განაპირობებს დღეს შექმნილი ფონი. ფონი არის ასეთი: ჩვენ ვცხოვრობთ რევოლუციური სცენარის პირობებში. მეორე – იმდენად დაძაბულია სიტუაცია, რომ სამოქალაქო დაპირისპირების საშიშროებაც არის და მესამე – იმ ხალხს, რომელსაც ქართულ პოლიტიკურ სივრცეში თავისი ფავორიტი არ ჰყავს, „უსაფრთხოების ქოლგა“ სჭირდება. 60%-მდეა იმ ადამიანების რაოდენობა, რომელიც ახალ პოლიტიკურ ძალას მიესალმება. განსაკუთრებით იმ ნაწილს, რომელსაც „ნაციონალური მოძრაობის“ რევანშის ეშინია, პოლიტიკური ძალის სახით უსაფრთხოების ქოლგა სჭირდება. ეს არის ის ხალხი, რომელმაც საპრეზიდენტო არჩევნების მეორე ტურში სალომე ზურაბიშვილს მისცა ხმა. არა იმიტომ, რომ ზურაბიშვილი ან „ქართული ოცნება“ ეხატებათ გულზე, არამედ იმიტომ, რომ „ნაციონალური მოძრაობის“ რევანშის შეეშინდათ. ამიტომაც ამისგან თავის დასაცავად ერთადერთი პოლიტიკური ძალა ეგულებოდათ „ქართული ოცნება“.

„უსაფრთხოების ქოლგის“ როლს „ქართული ოცნება“ ვეღარ ასრულებს. ის პოლიტიკური ძალა იქნება წარმატებული, რომელიც შეძლებს, რომ საზოგადოებაში გააჩინოს მათი დამცველის იმიჯი, თუნდაც „ნაციონალური მოძრაობისგან“ და თუნდაც პოლიტიკური რყევებისგან. ხაზარაძეს ამ ნიშის შევსება შეუძლია, ამის რესურსი აქვს. მას ბრძოლას დაუწყებს ერთი მხრივ „ქართული ოცნება“ და მეორე მხრივ „ნაციონალური მოძრაობა“, მაგრამ მას მოსახლეობას შეუძლია ძალიან სწორი და კარგი ეკონომიკური ხედვა შესთავაზოს. ნიშა და დრო მისთვის ახლა ძალიან ხელსაყრელია,“ – განაცხადა ლაგაზიძემ.