თბილისი პრაიდი: ღირსების მარშის გეგმის მიხედვით ჩატარება ვერ მოხერხდა. ბრძოლა გრძელდება
„თბილისი პრაიდის დასკვნითი ღონისძიების - “ღირსების მარშის” გეგმის მიხედვით ჩატარება“, - ამის შესახებ განცხადებას ავრცელებს თბილისი პრაიდის საორგანიზაციო ჯგუფი.
როგორც მათ მიერ გავრცელებულ წერილში ვკითხულობთ, ამის ერთ-ერთი მთავარი მიზეზი იყო ის, რომ შინაგან საქმეთა სამინისტრომ უარი განაცხადა ჰომოფობიური ჯგუფებისგან მათ დაცვაზე:
„მიუხედავად ამისა, ჩვენმა გუნდმა და უახლოესმა მხარდამჭერებმა სრულად არ დავთმეთ საჯარო სივრცე და პარტიზანული აქცია გუშინ, 8 ივლისს, შინაგან საქმეთა სამინისტროსთან მაინც გავმართეთ.
აღსანიშნავია, რომ ღირსების მარშში მონაწილეობის მისაღებად ათასამდე ადამიანი იყო დარეგისტრირებული, თუმცა 20 ივნისს, თბილისში განვითარებული შემზარავი მოვლენების შემდეგ, თბილისი პრაიდის გუნდმა მიიღო მტკივნეული, მაგრამ იმ მომენტისთვის ერთადერთი სწორი გადაწყვეტილება მსვლელობა, რომელიც 22 ივნისს უნდა გამართულიყო, გადაიდო.
პოლიტიკური პროცესების შედარებით დასტაბილურების შემდეგ, 6 ივლისს, შინაგან საქმეთა სამინისტროს წერილობით ვაცნობეთ, რომ “ღირსების მარშის” ახალი თარიღი 8 ივლისი იქნებოდა. არ მივიღეთ რა მათგან არანაირი პასუხი, 7 ივლისს, თბილისი პრაიდის გუნდმა უკვე საჯაროდ დააანონსა შემდეგი დღისათვის დაგეგმილი გადადებული მარში, იმ იმედით, რომ საქართველოს შინაგან საქმეთა სამინისტრო ითანამშრომლებდა ჩვენთან მონაწილეთა უსაფრთხოების უზრუნველსაყოფად.
სამინისტროს თანამშრომლები პირდაპირ კონტაქტზე კვლავ არ გამოვიდნენ. 7 ივლისს მათ სახალხო დამცველის მეშვეობით შემოგვითვალეს: “რაც გინდათ ის ქენით, თანამშრომლობა არ შედგება”...
შინაგან საქმეთა სამინისტროს ამგვარი დამოკიდებულება პრაიდის ორგანიზების პროცესში პირველი არ ყოფილა. გასული კვირების განმავლობაში, შსს-ს მაღალჩინოსნები და “ქართული ოცნების” ლიდერები დახურულ შეხვედრებზე პირდაპირ მოგვიწოდებდნენ გაგვეუქმებინა ღირსების მარში, რადგან ისინი “ხედავდნენ რისკებს” და არ შეეძლოთ ჩვენი დაცვა.
შექმნილ პირობებში, ასობით ადამიანის მონაწილეობით საჯარო ღონისძიების ჩატარება შეუძლებელი გახდა.
საქართველოს ხელისუფლების მოქმედებები თბილისი პრაიდთან დაკავშირებით ადამიანის უფლებების მხრივ ცალსახად უკან გადადგმული ნაბიჯი იყო. აშკარაა, რომ მმართველი გუნდი ლგბტ აქტივისტებისა და მხარდამჭერების მიერ თბილისში ხანმოკლე მშვიდობიანი აქციის გამართვის დაშვებას თავისთვის პოლიტიკურად წამგებიანად აღიქვამს, ხელისუფლებამ დაგვანახა, რომ საქართველოში ადამიანის ფუნდამენტური უფლებები დაცული არ არის და არც მისი დაცვის პოლიტიკური ნება არსებობს...
ზემოთ აღწერილი გამოწვევების მიუხედავად, ვფიქრობთ, რომ გვაქვს მნიშვნელოვანი შედეგებიც. უკანასკნელ თვეებში ლგბტქი თემის ხილვადობა გაიზარდა და საზოგადოებაში კიდევ უფრო გააქტიურდა ლგბტქი საკითხებზე დისკუსია... ბრძოლა გრძელდება!“
თბილისი პრაიდის მიერ ორგანიზებული ღირსების მარში 8 ივლისს, საღამოს 7 საათზე, შსს-ს შენობასთან, კახეთის გზატკეცილზე შედგა. მარში დაახლოებით 20 წუთს გაგრძელდა და მასში მონაწილეობა 20-მდე სამოქალაქო აქტივისტმა და ლგბტ თემის წარმომადგენელმა მიიღო.