აქციის 30-ე დღე: მსჯელობა შრომით უფლებებზე, უსაფრთხოებაზე
19 ივლისს, რუსთაველის გამზირზე მიმდინარე საპროტესტო აქციების 30-ე დღე სადისკუსიო პანელს ეთმობა. მსჯელობა შეეხება - შრომით კანონმდებლობასა და პრობლემის მოგვარების ალტერნატიულ გზებს.
სადისკუსიო პანელი მიჰყავს აქციის ერთ-ერთ ორგანიზატორს, შოთა დიღმელაშვილს, ხოლო მონაწილეები არიან გიორგი ცხადაია და გიგა ბედინეიშვილი. აზრის გამოთქმისა და შეკითხვების დასმის შესაძლებლობა აქვს ნებისმიერ მსურველს.
19 ივლისისთვის დაგეგმილი იყო მუსიკალური პროგრამა, თუმცა ის გადაიდო რამდენიმე დღის წინ თბილისში, მშენებლობაზე, მუშის,16 წლის გიორგი ბეშკენაძის დაღუპვის გამო.
საპროტესტო აქცია, რომლის მთავარი და უცვლელი მოთხოვნა კვლავაც შს მინისტრის, გიორგი გახარიას გადადგომაა, ყოველდღე სხვადასხვა თემას ეძღვნება. 18 ივლისს, ანტისაოკუპაციო აქცია "სირცხვილიას" 29-ე დღე რუსთაველის გამზირზე თავისუფალ მედიას მიეძღვნა.
რუსთაველის გამზირზე, პარლამენტის წინ აქციები დაიწყო მას შემდეგ, რაც 20 ივნისს, თბილისში, საპარლამენტთაშორისო მართლმადიდებლობის ასამბლეის ფარგლებში, რუსეთის დუმის კომუნისტმა დეპუტატმა, სერგეი გავრილოვმა, ასამბლეის სხდომა პარლამენტის სხდომათა დარბაზში, პარლამენტის თავმჯდომარის კუთვნილი ადგილიდან გახსნა.
20-21 ივნისს საქართველოს პარლამენტის შენობის წინ გამართული ხალხმრავალი საპროტესტო აქცია სამართალდამცავებმა რეზინის ტყვიების, ცრემლსადენი გაზისა და წყლის ჭავლის გამოყენებით დაშალეს. ხელისუფლება აცხადებს, რომ აქციის დაშლა გარდაუვალი აუცილებლობა იყო, მომიტინგეთა ნაწილის მხრიდან პარლამენტის შენობაში შეჭრის მცდელობის გამო.
რუსთაველის გამზირზე დემონსტრაციის დაშლისას, ოფიციალური მონაცემებით, დაშავდა 240-მდე ადამიანი, მაშ შორის - 80 პოლიციელი. ორმა ადამიანმა დაკარგა თვალი. აქციის მონაწილეები შედეგებზე პოლიტიკურ პასუხისმგებლობას სწორედ შს მინისტრს, გიორგი გახარიას აკისრებენ.