“ტრაგედია და უპრეცედენტო არაფერი ხდება ჩვენს ქვეყანაში”
“ქართული ოცნების” დეპუტატი, ირაკლი მეზურნიშვილი ხაზარაძე-ჯაფარიძის საქმეზე აშშ-ს საელჩოს მიერ გაკეთებულ განცხადებაზე “დამატებით განმარტებას” მოითხოვს. ამის შესახებ მან TV პირველის ეთერში ისაუბრა.
“რა თქმა უნდა, ამერიკის საელჩომ უნდა გააკეთოს დამატებითი განმარტება, კონკრეტულად, რას გულისხმობს და უფრო დეტალებში ალბათ მართებული იქნება, აშშ-ს საელჩომ უფრო ნათელი და ღია განმარტება გააკეთოს”, — ამბობს მეზურნიშვილი.
მისივე თქმით, შეიძლება ითქვას, მთავრობა გაგებით ეკიდება ამ განცხადებას, მაგრამ დეპუტატი ამბობს, რომ აშშ-შიც მომხდარა შემთხვევა, როცა მაღალი დონის ბიზნესმენის ან ხელისუფლების წარმომადგენლის მიმართ გაჩენილა კითხვები.
“შეიძლება ვთქვათ, რომ ჩვენ გაგებით ვეკიდებით ამ განცხადებას, მაგრამ აქვე მინდა, აღვნიშნო, რომ თვითონ აშშ-ში არაერთხელ მომხდარა ის, რომ მაღალი დონის, წარმატებული ბიზნესმენების, ხელისუფლების წარმომადგენლების მიმართ გაჩენილა კითხვები და ისინი აღმომჩდარან სასამართლოს წინაშე. ტრაგედია და უპრეცედენტო არაფერი ხდება ჩვენს ქვეყანაში”, — აცხადებს დეპუტატი.
მისივე თქმით, პროკურატურა დამოუკიდებელი ორგანოა.
“პროკურატურა არ უთანხმებს არც ანაკლიის კონსორციუმს, არც ხელისუფლებას და არც სხვებს, როდის უნდა მოხდეს ამა თუ იმ საქმესთან დაკავშირებით გამოძიება”, — აღნიშნა მმართველი გუნდის წევრმა.
შგახსენებთ, რომ საქართველოში აშშ-ს საელჩო თიბისი ბანკის დამფუძნებლების, მამუკა ხაზარაძისთვისა და ბადრი ჯაფარიძისთვის ბრალის წაყენების კონტექსტისა და დროის გარემოების გამო შეშფოთებას გამოხატავს.