ერდოანის თქმით, ტრამპთან მოლაპარაკებებს გამართავს Patriot-ის ტიპის რაკეტების შეძენის საკითხზე
თურქეთის პრეზიდენტმა რეჯეპ ტაიპ ერდოანმა როიტერსისთვის მიცემულ ინტერვიუში განაცხადა, რომ აშშ-ის პრეზიდენტ დონალდ ტრამპთან მოლაპარაკებებს გამართავს Patriot-ის ტიპის ამერიკული რაკეტების შეძენის საკითხზე. ერდოანის აზრით, ორი ლიდერის ურთიერთგაგების წყალობით შეიძლება გადალახულ იქნეს კრიზისი, რომელიც წარმოიშვა თურქეთის მიერ რუსეთის საჰაერო თავდაცვის სისტემების შეძენის შემდეგ.
ანკარის მიერ ივლისში რუსული S-400-ების შეძენამ გაზარდა ნატოელი მოკავშირის მიმართ სანქციების შემოღების ალბათობა. აშშ-ის სახელმწიფო დეპარტამენტმა განაცხადა, რომ Patriot-ზე თურქეთ-აშშ-ის გარიგების ვადები ამოიწურა.
ერდოანმა როიტერსს უთხრა, რომ ორი კვირის წინ ტელეფონით ესაუბრა ტრამპს Patriot-ის შესახებ და განაახლებს ამ თემაზე მოლაპარაკებებს, როცა ორი ლიდერი მომავალ კვირაში ნიუ-იორკში გამართავს შეხვედრას გაეროს გენერალური ასამბლეის სესიის დროს.
რაც შეეხება თურქეთის სახელმწიფო ბანკის, Halkbank-ის წინააღმდეგ აშშ-ის სანქციებს - ირანის მიმართ სანქციების დარღვევისთვის, - პრეზიდენტმა ერდოანმა იმედი გამოთქვა, რომ ორი ლიდერი მოახერხებს „ამ შეცდომის თავიდან აცილებას“. თურქეთის პრეზიდენტმა დასძინა, რომ მასა და აშშ-ის პრეზიდენტს შორის „განსაკუთრებული ნდობა“ არსებობს.
„ვფიქრობ, რომ ისეთი ქვეყანა, როგორიც აშშ არის, აღარ აწყენინებს თავის მოკავშირე თურქეთს“, - განაცხადა ერდოანმა როიტერსისთვის მიცემულ ინტერვიუში.