სუროგაციით დაბადებული ბავშვების მშობლებმა, პროტესტის ნიშნად, ღამე იუსტიციის სახლში გაატარეს
სუროგაციის გზით დაბადებული ბავშვების მშობლებმა, პროტესტის ნიშნად, ღამე იუსტიციის სახლში გაატარეს.
"6-7 კვირაა ჩვენი შვილების დაბადების მოწმობებს ველოდებით, მაგრამ არ გვაძლევენ, რის გამოც ქვეყანას ვერ ვტოვებთ და ჩარჩენილები ვართ აქ", - ეუბნება რადიო თავისუფლებას კრისტოფერ ორნჰაგენი, რომელიც საქართველოში შვედეთიდან ჩამოვიდა.
სუროგაციის გზით დაბადებული რამდენიმე ბავშვის მშობელს მე-2 თვეა, რაც შვილის დაბადების მოწმობის მიღებაზე უარს ეუბნებიან. ეს არის დაახლოებით 20 უცხოელი წყვილი აშშ-დან, დიდი ბრიტანეთიდან, გერმანიიდან, ესპანეთიდან, პოლონეთიდან, შვედეთიდან.
კრისტოფერ ორნჰაგენი ამბობს, რომ ზოგიერთი წყვილი იუსტიციის სახლში ყოველდღე დადიოდა, გახსნის საათებიდან დახურვამდე და დაბადების მოწმობების მიღებას მოითხოვდა:
"გუშინ, უბრალოდ უარი ვთქვით აქედან წასვლაზე. რაღაც მომენტში 40 ადამიანზე მეტნი ვიყავით. ჩვენი ოჯახები და ბავშვები აქ არიან. დაახლოებით 16 საათია აქ ვართ", - ამბობს კრისტოფერი და აგრძელებს: "არ ვიცით, რას ვიზამთ. ველოდებით მედიის ყურადღებას, რათა ცხადი გავხადოთ, როგორ აბსურდულ სიტუაციაში ვართ".
შაბათს, 14 სექტემბერს, იუსტიციის სახლი მოქალაქეებისთვის არ გაიხსნა.
დაბადების მოწმობების გარეშე, უცხო ქვეყნის მოქალაქეები, რომლებმაც სუროგაციით საქართველოში ისარგებლეს, შვილების სამშობლოში წაყვანას ვერ ახერხებენ. სახელმწიფო სერვისების განვითარების სააგენტო განმარტავს, რომ მათ სუროგაციის პროცესში კანონით განსაზღვრული წესები დაარღვიეს.
წაიკითხეთ მეტი: მშობლები დაბადების მოწმობებს ვერ იღებენ - სუროგაციის პრაქტიკა კანონის პირისპირ