პროკურატურა შეისწავლის შეწყალებისას სავარაუდო კორუფციაზე ევროპული საქართველოს განცხადებას
„შევისწავლით და მოვახდენთ შესაბამის სამართლებრივ რეაგირებას”, - უთხრეს პროკურატურაში რადიო თავისუფლებას „ევროპული საქართველოს“ განცხადების შესახებ.
პარტიის წარმომადგენელი, პარლამენტის წევრი ირმა ნადირაშვილი მსჯავრდებულთა შეწყალებისას კორუფციული გარიგების შესახებ საუბრობს. მან სწორედ ამ შინაარსის განცხადება შეიტანა 19 სექტემბერს გენერალურ პროკურატურაში.
„საქართველოს საადვოკატო წრეებთან დაახლოებული პირისგან, წყაროს გაუთქმელობის პირობით მივიღე ინფორმაცია, რომ სალომე ზურაბიშვილის პრეზიდენტობისას თითოეულ კონკრეტულ შემთხვევაში, როდესაც საქმე ეხება ამა თუ იმ პირის შეწყალებას, დაინტერესებული ადამიანები უკავშირდებიან პრეზიდენტის საპარლამენტო მდივანს, დიმიტრი გაბუნიას და მასთან გადიან ფინანსურ საკითხებს, თუ რა ფასად შეიძლება ესა თუ ის პირი იყოს შეწყალებული. ჩემ წყაროს არ აქვს დაზუსტებული ინფორმაცია, არის თუ არა ამ კორუფციულ სქემაში ჩართული უშუალოდ პრეზიდენტი ზურაბიშვილი, თუმცა ვარაუდობს, რომ მისი გვერდის ავლით ასეთი საკითხების მოგვარება არის შეუძლებელი. აღნიშნული წარმოადგენს ინფორმაციას შესაძლო დანაშაულების შესახებ, კერძოდ, სამსახურებრივი უფლებამოსილების ბოროტად გამოყენება (სსკ მუხლი 332) ქრთამის აღება (სსკ მუხლი 338), ქრთამის მიცემა (სსკ მუხლი 339), ზეგავლენით ვაჭრობა (სსკ მუხლი 3391), სამსახურებრივი გულგრილობა (სსკ მუხლი 342)” - ნათქვამია ნადირაშვილის მიერ პროკურატურაში შეტანილ განცხადებაში.
პარლამენტის წევრი გენერალურ პროკურატურას მოუწოდებს, დაუყოვნებლივ დაიწყოს გამოძიება, გონივრულ ვადებში ჩაატაროს შესაბამისი პროცესუალური მოქმედებები და მოახდინოს კანონით დადგენილი რეაგირება დანაშაულის შესახებ გავრცელებულ ინფორმაციაზე.
რადიო თავისუფლება მთელი დღის განმავლობში ცდილობდა პრეზიდენტის საპარლამენტო მდივანთან, დიმიტრი გაბუნიასთან დაკავშირებას, თუმცა ის არც სატელეფონო ზარებსა და არც გზავნილებს არ პასუხობს.
18 სექტემბერს, სწორედ დიმიტრი გაბუნიას უნდა გაემართა ბრიფინგი შეწყალების საკითხთან დაკავშირებით, თუმცა, ყველასგან მოულოდნელად, ბრიფინგი პრეზიდენტის სასახლეში თავად სალომე ზურაბიშვილმა გამართა, დიმიტრი გაბუნია კი საერთოდ არ გამოჩენილა ჟურნალისტებთან. მის შესაძლო კავშირზე მსჯავრდებულთა შეწყალების პროცესთან დაკავშირებით კი პრეზიდენტმა თქვა:
„იყო ძალიან ბევრი სპეკულაცია ამ პროცესში სხვადასხვა ადამიანის ჩარევაზე, მათ შორის, ჩვენი საპარლამენტო მდივანი, რომელიც არც კომპეტენციით და არც არანაირად არ იყო ამ პროცესში ჩართული. მისგან არ მიმიღია არც არანაირი რჩევა, არც თვითონ არავის უკითხავს მისთვის თუ რას ფიქრობდა რომელიმე ამ გადაწყვეტილებაზე. არ არის ეს მისი კომპეტენცია და მით უმეტეს, როცა ეს ეხება ყოფილ ადვოკატს. ასე რომ ეს გამორიცხულია და ეს სპეკულაციები უნდა დამთავრდეს მასზე თუ ვინმე სხვაზე ჩემს ადმინისტრაციაში, რადგან მე მივიღე გადაწყვეტილება და მე ვარ პასუხისმგებელი და არ მჩვევია, რომ ვინმე სხვაზე გადავიტანო ეს პასუხისმგებლობა“.