მიშა მშვილდაძე: მოითხოვდნენ, ზოგიერთ უმცირესობასთან გვერდით არ დავმდგარიყავით
ანტისაოკუპაციო აქციების ერთ-ერთმა ორგანიზატორმა მიშა მშვილდაძემ რუსთაველის გამზირზე მიმდინარე მიტინგზე სიტყვით გამოსვლისას განაცხადა, რომ ბოლო დღეებში ტიბუნიდან სამი მთავარი სიტყვა ისმოდა: თავისუფლება, ერთობა, თანასწორობა.
მშვილდაძე ამბობს, რომ თანასწორობა ნიშნავს ყველას თანასწორობას.
„ყველანი თანასწორები ვართ, პოლიტიკური უმცირესობებიც, ეთნიკური უმცირესობებიც, რელიგიური უმცირესობებიც, სექსუალური უმცირესობებიც. ეს არის ამ აქციების მთავარი მონაპოვარი. ჩვენგან მოითხოვდნენ, რომ ცოტა „გვეპოპულისტა“ ამ მიმართულებით და ზოგიერთ უმცირესობასთან გვერდით არ დავმდგარიყავით, მაგრამ - არა! არა!“ - თქვა მიშა მშვილდაძემ.
საქართველოს პარლამენტის წინ „სირცხვილიას“ საპროტესტო აქცია მიმდინარეობს. 20 ივნისის შემდეგ ეს არის უწყვეტი საპროტესტო აქციებიდან ბოლო, რომელიც პარლამენტის წინ გაიმართება. 21 სექტემბრიდან მოძრაობა სხვა ფორმით განაგრძობს საქმიანობას.