20-21 ივნისის საქმეზე ბრალდებულ სპეცრაზმელს პატიმრობა 10 000-ლარიანი გირაოთი შეუცვალეს
შსს-ს განსაკუთრებულ დავალებათა დეპარტამენტის თანამშრომელს, ლევან იმერლიშვილს, რომელიც 20-21 ივნისის საქმეზე არის ბრალდებული, აღკვეთის ღონისძიების სახით შეფარდებული პატიმრობა თბილისის საქალაქო სასამართლოს მოსამართლე ნინო ნაჭყებიამ 10 000-ლარიანი გირაოთი შეუცვალა, - ამის შესახებ რადიო თავისუფლებას იმერლიშვილის ადვოკატმა ანა კოტეტიშვილმა უთხრა. აღნიშნული ინფორმაცია დაგვიდასტურეს საქართველოს პროკურატურაში.
როგორც ბრალდებულის ინტერესების დამცველი განმარტავს, დაცვის მხარემ წარმოდგენილი ექსპერტიზის დასკვნის საფუძველზე მოითხოვა აღკვეთის ღონისძიების - პატიმრობის შეცვლა ახალი გარემოების საფუძველზე.
„ახალი გარემოება იყო ის, რომ მისი ჯანმრთელობის მდგომარეობა ამ ეტაპზე მძიმეა. შესაბამისად, საჭიროებს პენიტენციური დაწესებულების გარეთ მკურნალობას, სათანადო გარემოში“, - გვითხრა ანა კოტეტიშვილმა.
ადვოკატი გირაოს თანხად 5000 ლარის განსაზღვრას მოითხოვდა, თუმცა სასამართლომ 10 000 დაადგინა. ამასთან, იმერლიშვილს პირადობის მოწმობა და პასპორტი ჩამოართვეს.
ლევან იმერლიშვილი 15 ივლისს დააკავეს. მას ბრალი ედება სისხლის სამართლის კოდექსის 333-ე მუხლის მე-3 ნაწილის „ბ“ ქვეპუნქტით, რაც გულისხმობს სამსახურებრივი უფლებამოსილების გადამეტებას ძალადობით ან იარაღის გამოყენებით.
იმერლიშვილის დაკავებისას პროკურატურამ, 20-21 ივნისის ღამეს, სავარაუდოდ, მისი მოქმედების ამსახველი ვიდეომასალა გაავრცელა.
23 სექტემბერს კი თბილისის საქალაქო სასამართლოში პატიმრობაში დატოვა 20-21 ივნისის აქციის მონაწილე ლევან ჯიქური. მას ბრალად ედება პარლამენტთან მიმდინარე მიტინგის დროს ჯგუფურ ძალადობაში მონაწილეობა.
დაცვის მხარე პატიმრობის 5000-ლარიანი გირაოთი შეცვლას ჯიქურის ჯანმრთელობის მდგომარეობის მიზეზით მოითხოვდა.
ჯიქურმა სასამართლო სხდომაზე აღნიშნა, რომ პატიმრობისას არ ეძლევა ჯანმრთელობის სერვისების გამოყენების საშუალება და ერთადერთი პრეპარატი, რომელსაც ციხეში იღებს, „ძილის წამლებია“, შესაბამისად, არ შეუძლია ჯანმრთელობის გაუარესების დამადასტურებელი დოკუმენტების წარდგენა.
ლევან ჯიქური 20 ივნისის ღამის შემდეგ მკურნალობდა ღუდუშაურის საავადმყოფოში. სასამართლო პროცესების დასაწყისში ის ეტლის გარეშე, თავისით გადაადგილდებოდა, ბოლო სხდომებს კი ეტლში მჯდომი ესწრება.