მღვდელმონაზონი ანდრია სარია: პეტრე ცაავამ ინჩხურის მონასტერში განწესებაზე უარი მიიღო
მღვდელმონაზონ ანდრია სარიას თქმით, ჭყონდიდის ეპარქიის ყოფილმა მიტროპოლიტმა, პეტრე ცაავამ საპატრიარქოდან მიიღო ინფორმაცია, რომ მისი თხოვნა, დარჩენილიყო ჭყონდიდის ეპარქიაში, ილია მეორემ არ დააკმაყოფილა. პეტრე ცაავა შიომღვიმის მონასტერში წასვლის ნაცვლად, ინჩხურის წმინდა ამბროსი ხელაიას სახელობის მონასტერში განწესებას ითხოვდა.
„საპატრიარქოს განცხადება, რა თქმა უნდა, არის ამორალური. საპატრიარქოს ადმინისტრაციის მხრიდან უკეთესის მოლოდინი არ გვქონდა, იმ საშინელების შემდგომ, რაც მათ გააკეთეს, თუმცა ეს იყო შეთავაზება სიყვარულისმიერი, ჩვენ კიდევ ერთხელ ვამტკიცებდით ამ ყველაფრით, რომ არ ვართ დაპირისპირების, შუღლის და ბოროტების მომხრე, არამედ გვაქვს სურვილი, შიგნითვე, ეტაპობრივად მოწესრიგებულიყო ყველაფერი“, - განაცხადა მღვდელმონაზონმა ანდრია სარიამ.
მისივე განცხადებით, „საპატრიარქო და ხელისუფლება რამდენსაც არ უნდა ცდილობდნენ, მოქალაქეების აქტიური ნაწილი არ დაივიწყებს მეუფე იაკობის მხრიდან გაკეთებულ მარგინალურ განცხადებებს“.
„ვფიქრობ, რომ დღეს, როგორც არასდროს, საზოგადოება მოტივირებულია, რომ პასუხები მიიღოს კითხვებზე. შესაბამისად, როდესაც ჩვენ კონკრეტულ ადამიანებზე ვსაუბრობთ, ავტორიტეტებზე, კიდევ ერთხელ მინდა გითხრათ და ვთქვა, რომ არ არსებობს უპირობო ავტორიტეტები. როდესაც კითხვები არის, პასუხებია საჭირო“, - განაცხადა მღვდელმონაზონმა ანდრია სარიამ.
პეტრე ცაავას 31 ოქტომბერს, სინოდის კრებაზე შეუჩერეს მღვდელმთავრის სტატუსი და მოსანანიებლად შიომღვიმის მონასტერში მიუჩინეს ადგილი. მიტროპოლიტი ეპარქიაში დარჩენას და ინჩხურის მონასტერში ყოფნის უფლებას ითხოვდა. სინოდის სხდომის დატოვების შემდეგ, 31 ოქტომბერს, მან პატრიარქი „პიდარასტიაში“ ამხილა.