გახმაურებული მკვლელობის საქმეზე ძებნილი დააკავეს
შინაგან საქმეთა სამინისტროს ქვემო ქართლის პოლიციის დეპარტამენტის თანამშრომლებმა გასული წლის ოქტომბერში რუსთავში დავით მუმლაძის მკვლელობის ფაქტთან დაკავშირებით კიდევ ერთი პირი დააკავეს.
შს სამინისტროს ცნობით, სამართალდამცველების მიერ ჩატარებული ოპერატიულ-სამძებრო მოქმედებების შედეგად დაკავებულია თავისუფლების უკანონო აღკვეთისა და დამამძიმებელ გარემოებაში ჩადენილი განზრახ მკვლელობისთვის ძებნილი პირი - 1983 წელს
დაბადებული, წარსულში მრავალჯერ ნასამართლევი ზურაბ ჯღარკავა.
სამართალდამცველებმა დავით მუმლაძის მკვლელობიდან მალევე 5 პირი დააკავეს, მათ შორის - ორი მოქმედი პოლიციელი, ერთიც ყოფილი სამართალდამცველი.
ძებნა გამოცხადდა ზურაბ ჯღარკავაზე, რომლის მიმართ თავისუფლების უკანონო აღკვეთისა და დამამძიმებელ გარემოებაში ჩადენილი განზრახ მკვლელობის ფაქტებზე ძიება სსკ-ის 143-ე და 109-ე მუხლებით მიმდინარეობს.
მუმლაძე გასული წლის ოქტომბერში მოკლეს. მისი ცხედარი რუსთავის ტერიტორიაზე, მდინარე მტკვარში იპოვეს. ოქტომბერშივე ყველა დაკავებულს წინასწარი პატიმრობა შეუფარდეს. სასამართლოში საქმის არსებითი განხილვა იანვრის მეორე ნახევარში დაიწყება.