კორონავირუსი დაუდასტურდა სამედიცინო პერსონალის ხუთ წარმომადგენელს
რესპუბლიკური საავადმყოფოს კლინიკური დირექტორის დევი ტაბიძის თქმით, კლინიკა „თბილისის მედიცინის ინსტიტუტის" სამედიცინო პერსონალის ხუთ წარმომადგენელს კორონავირუსი დაუდასტურდა.
„დღეს [13 აპრილს] ჩვენ გავაგზავნეთ 25 ნიმუში ანალიზისთვის და იქიდან ცხრა პასუხი მივიღეთ დადებითი. „თბილისის მედიცინის ინსტიტუტიდან“ გვყავს ჩვენ ხუთი პაციენტი. პლუს ერთი, რომელიც ექიმი ქალბატონია, იმყოფება სეფსისის ცენტრში. მე, როგორც მაქვს ინფორმაცია, ის ჩვენთან არ არის. დანარჩენი ხუთი პაციენტი არის ჩვენთან და მედპერსონალია. ერთი მათი ნათესავი, ერთ-ერთი კიდევ... ასე რომ, რაოდენობა გაიზარდა. დანარჩენი ოთხი პაციენტი ამ 9-დან, რა თქმა უნდა, ჩვენი პაციენტები, სულ სხვადასხვა მიმართულებებიდან არიან. უცხოეთიდან ჩამოსული, კონტაქტები და ა.შ. დღეს საღამოს ცხრა პაციენტით გაგვეზარდა კოვიდინფიცირებულების როდენობა და მან მიაღწია 12-ს“, - თქვა დევი ტაბიძემ „პალიტრანიუსის“ ეთერში.
სამთავრობო ვებგვერდის stopcov.ge-ს მონაცემებით, საქართველოში კორონავირუსის დადასტურებულ შემთხვევათა რაოდენობამ 272-ს მიაღწია, მათ შორის, გამოჯანმრთელებულია - 68, სამი ადამიანი კი გარდაიცვალა. კარანტინის რეჟიმში იმყოფება 4 890. სტაციონარში, მეთვალყურეობის ქვეშ - 439. უცხოეთიდან სამკურნალოდ გადმოყვანილია საქართველოს სამი მოქალაქე.
ქვეყანაში კორონავირუსით პირველი ინფიცირებული 26 თებერვალს გამოავლინეს.
კორონავირუსის გავრცელების საფრთხის გამო 21 მარტიდან საქართველოში გამოცხადებულია ერთთვიანი საგანგებო მდგომარეობა.
31 მარტს, დილის 08:00 საათიდან ქვეყანაში ამოქმედდა ფაქტობრივად სრული კარანტინის რეჟიმი. 21:00 საათიდან 06:00 საათამდე გადაადგილება იკრძალება.