ერგნეთში ომის ფოტოების გამოფენა მოეწყო
8 აგვისტოს ერგნეთში, აგვისტოს ომის მუზეუმში, ფოტოგამოფენა გაიმართა.
"დღეს, აგვისტოს ომის მე-12 წლისთავზე, გადავწყვიტეთ, ომის თემაზე შექმნილი ფოტოების გამოფენა მუზეუმის ეზოში მოგვეწყო. აქ გამოფენილია როგორც ცხინვალის, ისე ქართული სოფლების ფოტოები. ჩვენ ვეცადეთ, რომ ორივე მხარე თანაბრად გვეჩვენებინა, რადგან ომი, ყველასთვის ომია", - ამბობს ლია ჩლაჩიძე, ერგნეთის აგვისტოს ომის მუზეუმის დამფუძნებელი.
მუზეუმის ეზოში დღეს ერგნეთელები და ადგილობრივი ხელისუფლების წარმომადგენლები შეიკრიბნენ და გამოფენილ ფოტოებთან გაიხსენეს 12 წლის წინანდელი ტრაგედია, დევნილობა, სახლების განადგურება და ცხოვრების თავიდან დაწყება.
ომის თემაზე შექმნილი ფოტოების გამოფენის იდეა, მუზეუმის დამფუძნებელს ლია ჩლაჩიძეს გაუჩნდა. სოფელ ერგნეთში, ცხინვალთან ახლოს აგვისტოს ომის მუზეუმში თავმოყრილია ის ნივთები, რომლებიც ომის შემდეგ მოძებნეს. აქვეა ფოტოები. ერგნეთში ომის მუზეუმი 2017 წელს გაიხსნა.