რუსულ ენაზე გაშვებული გადაცემის გამო ტვ „ობიექტივი“ დაჯარიმდა
კომუნიკაციების კომისიამ ტელეკომპანია „ობიექტივი“ 5000 ლარით დააჯარიმა ეთერში რუსულ ენაზე გაშვებული გადაცემების გამო და პროგრამის სამაუწყებლო ბადიდან დაუყოვნებლივ ამოღება დაავალდებულა.
საზოგადოებრივ-პოლიტიკური გადაცემა „ყველას გასაგონად“ „ობიექტივის“ ეთერში, რუსულ ენაზე, 25 აგვისტოს გავიდა. კომუნიკაციების კომისიის ინფორმაციით, „ობიექტივმა“ დაარღვია დასაშვები ხანგრძილივობა და განათავსა გადაცემა სახელმწიფო ენაზე სუბტიტრების გარეშე, რისი ვალდებულებაც ჰქონდა.
კომუნიკაციების კომისიის დადგენილებისა და „მაუწყებლობის შესახებ“ საქართველოს კანონის თანახმად, საქართველოში ავტორიზებული საერთო ეროვნული ტელემაუწყებელი უფლებამოსილია სამაუწყებლო ბადეში პროგრამები არასახელმწიფო ენაზე განათავსოს ისე, რომ მათი მთლიანი მოცულობა არ აღემატებოდეს დღიური მაუწყებლობის ხანგრძლივობის 10%-ს.
ამასთან, საუკეთესო დროს არასახელმწიფო ენაზე განთავსებული პროგრამების ხანგრძლივობა არ უნდა აღემატებოდეს საუკეთესო დროის 10%-ს.
მაუწყებელი ასევე ვალდებულია, პროგრამა სამაუწყებლო ბადეში განათავსოს საქართველოს სახელმწიფო ენაზე სუბტიტრებით.