სააკაშვილი: ჩვენი აქციების რაოდენობა გაიზრდება, მათ უზრუნველვყოფთ დამცავი საშუალებებით
საარჩევნო ბლოკის „ერთიანი ნაციონალური მოძრაობა - გაერთიანებული ოპოზიცია "ძალა ერთობაშია"“ პრემიერ-მინისტრობის კანდიდატი, ექსპრეზიდენტი მიხეილ სააკაშვილი "ფეისბუკის" საკუთარ გვერდზე ეხმიანება ბათუმში 16 ოქტომბერს გამართულ ხალხმრავალ აქციას და ამბობს, რომ ეს ხალხის ერთიანობისა და შემართების ამაღელვებელი დემონსტრაცია იყო:
„ამდენი წლის ლაპარაკის შემდეგ, რომ ნაციონალები რადარებიდან გაქრნენ, პარტია, რომელმაც შექმნა ქართული თანამედროვე სახელმწიფოებრიობა, ბრუნდება და ბრუნდება მთელი ძალით და განახლებული რესურსებით და გუშინდელი აქცია იყო სწორედ გამარჯვებული პარტიის აქცია!“, - წერს მიხეილ სააკაშვილი "ფეისბუკში" და ამბობს, რომ პარტია მზადაა მასობრივი მობილიზაციისთვის, ამ მობილიზაციის მოსამზადებელი ეტაპები კი იქნება შემდგომი აქციები, რომლებიც დამცავი საშუალებებით გაიმართება:
„ჩვენი მრავალრიცხოვანი აქციების და მათი რაოდენობა სულ უფრო გაიზრდება, უზრუნველყოფს დამცავი საშუალებებით, პირველ რიგში ნიღბებით და სხვა საჭირო საშუალებებით - ამის შესახებ ჩვენ უკვე ვართ ყველა რეგიონალურ ორგანიზაციაში შეთანხმებული..
მაგრამ, ივანიშვილს ტყუილად გონია კოვიდის მეშვეობით ის შეძლებს არჩევნების გაყალბებას და მერე ამას ყველა წყნარად სახლში დაელოდება და შეხედავს.
ჩვენ მზად ვართ მასობრივი მობილიზაციისთვის და ამ მობილიზაციის მოსამზადებელი ეტაპებია სწორედ ჩვენი შემდგომი აქციები“, - აღნიშნავს მიხეილ სააკაშვილი. იგი აკრიტიკებს საქართველოს ხელისუფლებას კორონავირუსის გავრცელების პრევენციული ღონისძიებების არაეფექტიანობის გამო.
„როცა ვლაპარაკობთ უპასუხისმგებლო დამოკიდებულებაზე განაპირობა იმან, რომ როდესაც გამოაცხადეს მთელი მსოფლიოს გასაგონად, რომ დაამარცხეს კოვიდი და სინამდვილეში ხელი არ გაუნძრევიათ აქტიური ღონისძიებების გასატარებლად.
კოვიდით დაინფიცირება, ახალი უპრეცედენტო რეგიონში რეკორდული ტალღა გამოიწვია უპასუხისმგებლობამ, კორუფციამ, ორმაგმა სტანდარტებმა და მუდმივმა ტყუილებმა და ეს ტყუილები გრძელდება!“ - აღნიშნავს მიხეილ სააკაშვილი.
გუშინ, 16 ოქტომბერს, საარჩევნო ბლოკმა „ნაციონალური მოძრაობა - გაერთიანებული ოპოზიცია "ძალა ერთობაშია"“ ბათუმში ხალხმრავალი აქცია გამართა. აქციის მონაწილეების უმრავლესობას პირბადე არ ეკეთა, არ იყო დაცული სოციალური დისტანციაც. აქციის მიზანი აჭარის მაჟორიტარი კანდიდატების საზოგადოებისთვის კიდევ ერთხელ გაცნობა იყო. "ქართული ოცნების" წარმომადგენლებმა და სახალხო დამცველმა ხალხმრავალი აქციის დამცავი საშუალებების გარეშე გამართვის გამო გააკრიტიკეს „ნაციონალური მოძრაობა - გაერთიანებული ოპოზიცია "ძალა ერთობაშია"“.