ფიცრებით აჭედილი ვიტრინები ვაშინგტონში, ნიუ-იორკში, ლოს-ანჯელესში...
აშშ-ში 3 ნოემბრის საპრეზიდენტო არჩევნებია. მცირე მოვაჭრეებმა ქალაქებში ვიტრინები აფიცრეს, რათა არჩევნების დროს ან შემდგომ, ქუჩებში შესაძლო მღელვარებისას, თავდასხმისგან დაიცვან. ვაშინგტონის ცენტრში საწარმოებისა და სამთავრობო შენობების ფანჯრები და კარები ფანერით დაფარეს. ნიუ-იორკში ბევრმა მაღაზიამ, რესტორანმა და სასტუმრომ ჩახერგა შესასვლელები და ფანჯრები. ასევე იქცევიან სხვა ქალაქებში, მათ შორის ლოს-ანჯელესში.
2 ნოემბერია, საპრეზიდენტო არჩენებამდე ორი დღეა დარჩენილი. ნიუ-იორკში, მეხუთე ავენიუზე მდებარე Saks-ის მაღაზიას უზრუნია და ვიტრინები აუფიცრავს კენჭისყრის შემდგომი არეულობის მოლოდინში.
დაცვის კერძო სამსახურიც მობილიზებულია მეხუთე ავენიუზე, Saks-ის შენობასთან.
პოლარიზებული პოლიტიკური გარემო შეიქმნა შეერთებულ შტატებში არჩევნების წინა პერიოდში, როცა მეტოქეები პრინციპულად განსხავებული პოზიციებიდან კამათობდნენ. მოქმედი პრეზიდენტი, რესპუბლიკური პარტიის წარმომადგენელი დონალდ ტრამპი, და დემოკრატი ჯო ბაიდენი სხვადასხვა პოლიტიკური და სოციალური ხედვისა არიან.
ერთ-ერთი ბოლო დებატებისას პრეზიდენტობის კანდიდატებმა მკვეთრად განსხვავებული პოზიციები გამოხატეს რასიზმის პრობლემის, იმიგრაციის, ჯანდაცვის სისტემის რეფორმირების, საგარეო პოლიტიკისა და გლობალური დათბობის საკითხებზე.
მათ შორის აზრთა სხვადასხვაობამ საზოგადოების ორ ნაწილად გაყოფა გააღრმავა. ამასაც უკავშირდება შფოთი არჩევნების შემდგომი არეულობის შესაძლებლობის გამო.
Bergdorf Goodman-ისა და Saks-ის გარდა, მანჰეტენში, მეხუთე ავენიუზე, უამრავი სხვა მაღაზია და ოფისია, რომლებსაც არჩევნების შემდგომი არეულობისა ეშინიათ.
ეს ფოტო ნიუ-იორკში, მანჰეტენის ცენტრალურ უბანშია გადაღებული. ამ მაღაზიის მფლობელმაც ამჯობინა, შესაძლებელი არეულობის შიშით, ვიტრინებისთვის ფანერები აეკრა.
განსხვავებული ვითარება არც სოჰოშია, ნიუ-იორკის იმ უბანში, სადაც უფრო მეტი გალერეები, დიზაინერების მცირე მაღაზიები და რესტორნებია. ამ მაღაზიის ფანჯრები და შესასვლელი გულმოდგინედ დაიფარება ფანერით.
ესე ფოტოც სოჰაშია გადაღებული. მანეკენმა შეიძლება კარგა ხანს ვერ „იხილოს“ დღის სინათლე, სანამ საფრთხე ჩაივლიდეს.
ვაშინგტონში 1 ნოემბერს ასევე მიდის მზადება შესაძლო საპროტესტო გამოსვლებისა და მსვლელობების დროს მოსალოდნელი არეულობისგან თავის დასაცავად.
აშშ-ს რასიზმის წინააღმდეგ გამოსვლების მძლავრმა ტალღამ გადაუარა მინეაპოლისში, მინესოტაში, პოლიციელის მიერ აფრიკელ-ამერიკელ ჯორჯ ფლოიდის დაკავებისა და მოკვლის დროს. მშვიდობიანი გამოსვლების პარალელურად არაერთ შტატსა და ქალაქში მოხდა არეულობა და ძალადობა.
მოგვიანებით, უკვე სექტემბრის დასაწყისში, არეულობა იყო კენოშაში, უისკონსინის შტატში. აშშ-ის პრეზიდენტმა დონალდ ტრამპმა ამ არეულობებს „შინაგანი ტერორიზმის აქტი“ უწოდა. კენოშაში ვიზიტისას ტრამპმა გააკრიტიკა ადგილობრივი დემოკრატი ხელმძღვანელები. მისი თქმით, მათ ოპერატიულად არ მოახდინეს რეაგირება მის წინადადებაზე ფედერალურ დონეზე გაეწიათ დახმარება.
აგვისტოს ბოლოს ერთი ადამიანი მოკლეს, როცა დონალდ ტრამპის მომხრეებსა და მემარცხენე ფრთის ჯგუფების საპროტესტო გამოსვლის მონაწილეებს შორის შეტაკება მოხდა აშშ-ის ჩრდილო-დასავლეთში, ორეგონის შტატის ქალაქ პორტლენდში. ძალადობის ამგვარი გამოვლენის ექოა შიში არეულობისა, რასაც შეიძლება მაღაზიებისა და მსგავსი ობიექტების ძარცვა მოჰყვეს.
კალიფორნიაში, ლოს-ანჯელესში მდებარე ეს რესტორანი Subway-ის ქსელს ეკუთვნის. აშშ-ში, კორონავირუსის პანდემიის პირობებში, თავყრილობის არაერთი ფორმა შეიზღუდა. მსოფლიოში კოვიდით დაღუპულთა შორის უდიდესია ამ ქვეყანაში დაღუპულთა რიცხვი. ეს რესტორანი, მიუხედავად იმისა, რომ, ფიცრების აფარების გამო, სახე მთლიანად დაკარგა, ღიაა და სტუმრებს ეპატიჟება.
23 ოქტომბრის დებატების დროს ბაიდენმა ტრამპი დაადანაშაულა კრიზისზე არაადეკვატურ რეაგირებაში და თქვა, რომ ამის გამო ქვეყანას ბნელი ზამთარი ელოდება. მან დონალდ ტრამპს დააკისრა პასუხისმგებლობა კორონავირუსით 200 ათასზე მეტი ამერიკელის გარდაცვალების გამო და თქვა, რომ ის პრეზიდენტად არ უნდა დარჩეს. თავის მხრივ, ტრამპმა ბაიდენს ბრალი დასდო ეკონომიკის გაჩერების მცდელობაში, რასაც უამრავი უარყოფითი შედეგი მოჰყვება.
თუკი რომელიმე სავაჭრო ობიექტს დაცვა სჭირდება, პირველ რიგში, ალბათ, ძვირფასეულობით მოვაჭრე მაღაზიას. და ეს მაღაზია ბევერლი ჰილზში, კალიფორნიაში, ალბათ, დარწმუნებით შეიძლება ითქვას, შესანიშნავად არის დაცული შეიარაღებული თავდასხმისგან, მაგრამ მოძალადე ბრბოსგანმაღაზიის დაცვა ასეთი შეფიცვრით უფრო ეფექტიანია.
ისევე როგორც აშშ-ის სხვა ქალაქებში, ფილადელფიაშიც იფიქრეს შესაძლებელ არეულობაზე საპრეზიდენტო არჩევნებისას და შემდგომ და ოფისებს ფიცრის დამცველი ფენა გაუკეთეს.
3 ნოემბერს აშშ-ის აღმოსავლეთში მდებარე შტატ ვერმონტში დაიწყო ხმის მიცემა. ყველაზე ბოლოს საარჩევნო უბნები დაიხურება ალასკაზე აშშ-ის უკიდურეს დასავლეთში, როდესაც ქვეყნის აღმოსავლეთში უკვე გათენებული იქნება.