უკრაინის უმაღლესმა რადამ თავის თავმჯდომარეს ორი დღით აუკრძალა პლენარული სხდომების გაძღოლა

უკრაინის უმაღლესმა რადამ თავის თავმჯდომარეს, დმიტრო რაზუმკოვს ორი დღით აუკრძალა პლენარული სხდომების გაძღოლა. ეს მოხდა რაზუმკოვსა და უდიდეს ფრაქცია „ხალხის მსახურს“ შორის კონფლიქტის ფონზე. რაზუმკოვი ამ ფრაქციის საარჩევნო სიაში პირველი იყო. როგორც ვარაუდობენ, უკვე ხუთშაბათს შეიძლება ჩატარდეს კენჭისყრა რადის თავმჯდომარის თანამდებობიდან რაზუმკოვის გადაყენების თაობაზე.


სპიკერისთვის სხდომის წაყვანაზე უარის თქმას მხარი დაუჭირა 240-მა დეპუტატმა, საჭირო იყო მინიმუმ 226 ხმა. ამასთან, პრეზიდენტ ვოლოდიმირ ზელენსკის პარტია „ხალხის მსახურისა“ და მისი ტრადიციული მოკავშირეების წევრთა უმრავლესობამ მხარი დაუჭირა რაზუმკოვისთვის სხდომების წაყვანის აკრძალვას. წინააღმდეგი იყო ოპოზიცია - როგორც პეტრო პოროშენკოს მომხრეები, ისე პრორუსული ორიენტაციის „ოპოზიციური პლატფორმა“.


რაზუმკოვი ზელენსკის საარჩევნო კამპანიის ერთ-ერთი ხელმძღვანელი იყო 2019 წელს და რადის თავმჯდომარე გახდა, როგორც ზელენსკისთან ერთ-ერთი ყველაზე უფრო დაახლოებული პოლიტიკოსი. მოგვიანებით მასა და პრეზიდენტის ოფისს შორის კონფლიქტი გაჩნდა. ზელენსკის მომხრეები რაზუმკოვს ბრალს სდებენ, რომ ის საბოტაჟს უკეთებს პრეზიდენტის ზოგიერთ ინიციატივას, კერძოდ, კანონს „დეოლიგარქიზაციის“ შესახებ. რაზუმკოვის კრიტიკოსები ფიქრობენ, რომ მას საკუთარი პოლიტიკური ამბიციები გაუჩნდა პრეზიდენტის თანამდებობისთვის ბრძოლის ჩათვლით. მისი გადაყენების შესახებ ხელმოწერების შეგროვება დაიწყო ფრაქცია „ხალხის მსახურმა“. გუშინ გამოაცხადეს, რომ საკმარისი რაოდენობის ხელმოწერებია შეგროვებული.