აშშ-ის 42-ე პრეზიდენტი ბილ კლინტონი ჰოსპიტალიზებულია
აშშ-ის ექსპრეზიდენტი, 75 წლის ბილ კლინტონი ჰოსპიტალიზებულია. ის სამშაბათიდან იმყოფება კალიფორნიის ირვინის უნივერსიტეტის სამედიცინო ცენტრის ინტენსიური თერაპიის განყოფილებაში.
ტელეკომპანია CNN ექიმებზე დაყრდნობით იუწყება, რომ კლინტონს ჰოსპიტალიზაცია დასჭირდა ინფექციის გამო, რომელსაც კავშირი არ აქვს კოვიდთან. ბილ კლინტონის ოფიციალური წარმომადგენელი ანხელ ურენაც ტვიტერზე წერს, რომ პრეზიდენტის მკურნალობა არ უკავშირდება COVID-19-ს. ურენას ინფორმაციით, ბილ კლინტონმა გამოჯანმრთელება დაიწყო, კარგ განწყობაზეა და ექიმების და ექთნების მადლიერია.
CNN-ის ინფორმაციით, კლინტონის ჰოსპიტალიზაცია არ უკავშირდება გულის პრობლემასაც, რომელიც ექსპრეზიდენტს ადრე ჰქონდა. ბილ კლინტონის მკურნალი ექიმები მხოლოდ იმას ამბობენ, რომ ჰოსპიტალიზაცია საჭირო გახდა დეტალური გამოკვლევის და ანტიბიოტიკებით მკურნალობისთვის.
დემოკრატი ბილ კლინტონი აშშ-ის პრეზიდენტი იყო 1993-2001 წლებში.