ღამბაშიძე: როგორ უნდა დაასრულო მინიმუმ 500 000 მოქალაქე? რა მეთოდი არსებობს ისეთი, რომელიც აქამდე არ უცდიათ და რომელიც ძალადობას არ გულისხმობს?
0
“თანამედროვე დასავლური პოლიტიკის ერთი სიტყვით აღწერა თუ შეიძლება, ეს არის სიტყვა თანამშრომლობა. თანამშრომლობა გულისხმობს ერთმანეთის არსებობის აღიარებას, თანაარსებობის გარდაუვლობის აღიარებას.
ამის ალტერნატივა არის მთელი ის სიგიჟე, რაც დასავლეთმა გამოიარა ამ წერტილამდე მოსასვლელად.
ქრისტიანებს ებრაელები არ მოსწონდათ, კაცებს ქალები, გერმანელებს ფრანგები, ფრანგებს ინგლისელები, პროტესტანტებს კათოლიკეები, კონსერვატორებს ლიბერალები, ფრანკისტებს კომუნისტები, ქერებს შავები და ა.შ. რა მოთვლის.
ბოლოს ყველანი შეთანხმდნენ, რომ ოპონენტი მტერი არ არის. იმიტომ, რომ თუ მტრად აღიქვამ, მას შესაბამისადაც უნდა მოექცე, რაც აუცილებლად მიგიყვანს საკონცენტრაციო ბანაკამდე და გაზის კამერამდე. გარდაუვალია რომ ეს ასე არ მოხდეს.
სამწუხაროდ ჩვენი ტრადიციაც საკონცენტრაციო ბანაკია. 70 წელი ვიცხოვრეთ ქვეყანაში, რომელიც პერმანენტულად ასუფთავებდა საჯარო სივრცეს “მტრებისგან”. თანაცხოვრების გამოცდილება არ გვაქვს, მაგრამ ვეჭვობ გვაქვს ამის მოთხოვნა. იმიტომ, რომ დავიღალეთ. უკვე პატარები არ ვართ და ზუსტად ვიცით: ან მუდმივ ჭიდაობაში ვიქნებით, ან ერთმანეთს ვაღიარებთ და საერთო მიზნებისკენ სავალ გზებზე დავიწყებთ ფიქრს.
ამ ყველაფრის გათვალისწინებით ათასჯერ უფრო გულისამრევი და განსაცვიფრებელია ქართული ოცნების კლიპი, რომელიც მის ფეისბუქზე დაიდო დღეს. განსაცვიფრებელია კალაძის გაბრაზებული მიმართვა ოპონენტების დასრულებასთან დაკავშირებით.
თავად დაფიქრდით: როგორ უნდა დაასრულო მინიმუმ 500 000 მოქალაქე? რა მეთოდი არსებობს ისეთი, რომელიც აქამდე არ უცდიათ და რომელიც ძალადობას არ გულისხმობს?
დიდი იმედი მაქვს ამომრჩეველი სწორად გაიგებს რა ცეცხლს ეთამაშება ქართული ოცნებისთვის მორიგ ჯერზე ძალაუფლების მიცემისას,” – წერს სოციალურ ქსელში ფილოსოფოსი ლევან ღამბაშიძე.