ევროპარლამენტარები: სააკაშვილის ციხეში ყოფნა აჩენს შეკითხვას დევნის პოლიტიკური ხასიათის შესახებ
19 ოქტომბერს ევროპარლამენტართა ჯგუფი გამოეხმაურა საქართველოში შექმნილ ვითარებას. მათ მიერ გამოქვეყნებულ განცხადებაში ლაპარაკია იმაზე, რომ ევროკავშირთან დაახლოების პროცესში საქართველომ უნდა შეასრულოს ნაკისრი ვალდებულებები და ერთგული უნდა იყოს ევროპული ღირებულებებისა. განცხადება შეიცავს მოწოდებას, პატიმრობიდან გაათავისუფლონ ყოფილი პრეზიდენტი მიხეილ სააკაშვილი:
„საქართველომ, რომელიც ევროკავშირთან ასოცირებული ქვეყანაა, ვალდებულება იკისრა, დაიცვას ევროპული ღირებულებები და პრინციპები, როგორებიცაა დემოკრატია, ადამიანის უფლებები და კანონის უზენაესობა. ქართველი ხალხი, რომელიც საქართველოს ევროპული მისწფრაფებების ძლიერი მხარდამჭერია, და საქართველოს ევროპელი პარტნიორები მთავრობისგან და მმართველი პარტიისგან მოელიან ამ პრინციპებისა და სტანდარტების სრულად დანერგვას და დაცვას.
ახალგაზრდა ევროპულ დემოკრატიებში, რომლებიც ჯერაც ებრძვიან პოსტტოტალიტარულ ჩვევებს, ასეთი მაგალითები - როგორიცაა იანუკოვიჩის დროინდელი უკრაინა - ნათელყოფს, რომ პოლიტიკური ოპოზიციის ლიდერის, პრეზიდენტის ან პრემიერ-მინისტრის დაპატიმრება და ციხეში ჩასმა მსოფლიოს მყისვე უგზავნის საგანგაშო სიგნალს, რომ მოცემულ ქვეყანაში დემოკრატია და კანონის უზენაესობა შესაძლოა უარესდებოდეს.
ის ფაქტი, რომ საქართველოში ოპოზიციის ლიდერი და ყოფილი პრეზიდენტი ციხეში იმყოფება, აჩენს შეკითხვას დევნის პოლიტიკური ხასიათის შესახებ. პრემიერ-მინისტრ ღარიბაშვილის საჯარო გამოსვლები მხოლოდ ადასტურებს სააკაშვილის წინააღმდეგ საქმეების პოლიტიკურ მოტივებს, რაც სრულიად მიუღებელია ევროპული ტიპის სამართლებრივ სისტემაში და ეს ძირს უთხრის ხალხის არჩევანს საქართველოს ევროპული გზის სასარგებლოდ.
წყდება საქართველოს ევროპული მომავლის ბედი. მთავრობას და მმართველ პარტია „ქართულ ოცნებას“ ამ მომენტში მთავარი პასუხისმგებლობა აკისრიათ ამ ვითარებისთვის და მის გადაწყვეტაში. ისინი დგანან არჩევანის წინაშე - კვლავაც ეცადონ უარყოფითი შედეგების განეიტრალებას, გააღვივონ პოლარიზაციას და უნდობლობა ქვეყნის შიგნით და საერთაშორისო მასშტაბით, სანამ ბატონი სააკაშვილი ციხეშია, ან ყურადღება კვლავ მიმართონ კანონის უზენაესობასა და ევროპული ტიპის სამართლებრივ სტანდარტებზე, რასაც გადამწყვეტი მნიშვნელობა აქვს საქართველოს ევროპული მისწრაფებებისთვის.
ბატონი სააკაშვილის საქმე ადამიანის უფლებების ევროპულ სასამართლოს გადაეცა. ეს არის გზა, ევროპული მართლმსაჯულება შეეხოს საქართველოს მომავლისთვის სასიცოცხლოდ მნიშვნელოვან ამ საქმეს და ევროკავშირი ყურადღებით დააკვირდება მის განხილვას და მისი დასკვნების შესაბამისად იმოქმედებს. სანამ ევროსასამართლო განიხილავს საქმეს, ბატონი სააკაშვილი ციხიდან უნდა გაათავისუფლონ,“ ვკითხულობთ ევროპარლამენტართა განცხადებაში, რომელსაც ხელს აწერენ:
ანდრიუს კუბილიუსი, Euronest-ის საპარლამენტო ასამბლეის თანათავმჯდომარე
რასა იუკნევიჩიენე, სამხრეთ კავკასიასთან ურთიერთობების დელეგაციის (DSCA) ხელმძღვანელი
რიჰო ტერასი
მირიამ ლექსმანი
სანდრა კალნიეტე