გრიპის ვაქცინის ნაცვლად C ვიტამინის გაკეთების შესახებ ცნობას რეგულირების სააგენტო გამოეხმაურა
სამედიცინო და ფარმაცევტული საქმიანობის რეგულირების სააგენტო, გოგელიას კლინიკასთან დაკავშირებით გავრცელებულ ინფორმაციას ეხმაურება. მოქალაქეების ნაწილი, რომელიც, 20 ოქტომბერს, დილიდან "გოგელიას კლინიკაში" გრიპის საწინააღმდეგო ვაქცინის გასაკეთებლად მივიდა, აცხადებდა, რომ კლინიკის თანამშრომლებმა მოატყუეს და ვაქცინის ნაცვლად C ვიტამინი გაუკეთეს.
როგორც სააგენტოს დირექტორი ზაალ კაპანაძე აცხადებს, დაწესებულებაში იმუნიზაციის განხორციელების უფლება არ ჰქონდა და ექიმს შესაბამისი სერტიფიკატიც არ გააჩნია.
„კლინიკას იმუნიზაციის ჩატარების უფლება არ ჰქონდა, რადგან მაღალი რისკის შემცველი საქმიანობის რეესტრში, აღნიშნულ მისამართზე აღნიშნული საიდენტიფიკაციო კოდით, დარეგისტრირებული არ არის. რაც შეეხება ექიმს, 2020 წელს სააგენტომ გამოავლინა, რომ აღნიშნული პირი ეწეოდა უკანონო საექიმო საქმიანობას და საქმიანობდა გაყალბებული სერტიფიკატებით, აღნიშნული პირის მიმართ შედგა ადმინისტრაციულ სამართალდარღვევათა ოქმი და ასევე, საქმე გადაეცა პროკურატურას“, - აღნიშნა ზაალ კაპანაძემ.
რეგულირების სააგენტოს წარმომადგენლები საქმის დეტალებს ეცნობიან.
ზაალ კაპანაძემ აღნიშნა, რომ დღევანდელი კანონმდებლობით, აბულატორიული ტიპის საქმიანობის დაწყება ხდება სააგენტოში სავალდებულო შეტყობინებას ნიადაგზე, თუმცა უწყების ხელმძღვანელი განმარტავს, რომ მომზადებულია საკანონმდებლო პაკეტი, რომელიც ამბულატორიული კლინიკისთვის საქმიანობის დაწყების მექანიზმს ბევრად გააუბჯობესებს და პაციენტებზე მეტად ორიენტირებულს გახდის.
„იმისათვის, რომ მინიმუმამდე იყოს დაყვანილი მსგავსი ტიპის შემთხვევები, მნიშვნელოვანია, რომ ამბულატორიული დაწესებულების გახსნისთვის საჭირო იყოს სააგენტოს წინასწარი ნებართვა და სამედიცინო საქმიანობის დაწყების საფუძველი არ გახდეს მხოლოდ შეტყობინება. აღნიშნული კანონი 2009 წელს არის მიღებული, განახლება ყველაფერს სჭირდება, შესაბამისად ჯანდაცვის სამინისტრომ და სააგენტომ მოამზადა პაკეტი, რომელიც გადაგზავნილია პარლამენტში და ალბათ ამ საკითხთან დაკავშირებით უახლოეს მომავალში იმსჯელებენ“, -აღნიშნავს რეგულირების სააგენტოს დირექტორი.
როგორც ერთ-ერთი მოქალაქე, თათია დვალიშვილი აცხადებს, მას ეჭვი მას შემდეგ გაუჩნდა, რაც მედიკამენტის ყუთის ჩვენებაზე ექიმებმა უარი უთხრეს.
"როცა ბავშვის აცრა გადავიფიქრე, უცებ აუწიეს ხელი და დაარჭეს ნემსი. ჩავვარდი შოკში და ავტეხე ამბავი... ჩემი ქმარი შევარდა და აღიარეს რომ აცრეს C ვიტამინით... ფულის გაკეთების მიზნით ითაღლითეს (ერთ ვაქცინაში 75 ლარი გადავიხადეთ)", - წერს დვალიშვილი ფეისბუკზე.