სულ მცირე 27 ადამიანი დაიღუპა სირიაში მომხდარი აფეთქებისა და დაბომბვის შედეგად
სირიის დედაქალაქში სამხედროების კუთვნილ ავტობუსზე განხორციელებული თავდასხმისა და მოგვიანებით ქვეყნის ჩრდილო-დასავლეთში მეამბოხეების კონტროლქვეშ მყოფ ქალაქზე მიტანილი იერიშის შედეგად, 20 ოქტომბერს, სულ მცირე 27 ადამიანი დაიღუპა.
სირიის სახელმწიფო მედიის ცნობით, ოთხშაბათს გზაზე დამონტაჟებული ორი ბომბი აფეთქდა იმ დროს, როდესაც სირიელი სამხედროებით სავსე ავტობუსი დამასკის ხიდზე გადადიოდა. აფეთქებას ოფიციალური ინფორმაციით 14 ადამიანი შეეწირა.
თავდასხმაზე პასუხისმგებლობა არც ერთ დაჯგუფებას არ აუღია.
რამდენიმე წუთის შემდეგ სამთავრობო ჯარების მიერ გახსნილი საარტილერიო ცეცხლის შედეგად 13 ადამიანი, მათ შორის, რამდენიმე ბავშვი დაიღუპა სირიელი მეამბოხეების კონტროლქვეშ მყოფ იდლიბის რეგიონში. ინფორმაცია ამის შესახებ ბრიტანეთში მოქმედმა სირიის ადამიანის უფლებათა ობსერვატორიამ გაავრცელა.
სირიაში 10 წელიწადზე მეტია გრძელდება შეიარაღებული კონფლიქტი სირიის პრეზიდენტ ბაშარ ალ-ასადის არმიასა და სირიელ მეამბოხეებს შორის, რასაც 350 ათასი ადამიანი შეეწირა, მოსახლეობის ნახევარზე მეტი კი დევნილად იქცა.