ცხინვალის დე ფაქტო კაგებე ე.წ. საზღვრის დარღვევის გახშირებულ შემთხვევებზე იუწყება
"33 სახელმწიფო საზღვრის დამრღვევია, 22 კი სასაზღვრო რეჟიმის დამრღვევი...
სახელმწიფო საზღვარზე არსებული ადმინისტრაციულ-სამართლებრივი რეჟიმების დამრღვევებთან მიმართებაში ჩატარებული პროცედურული ღონისძიებების შედეგად 25 პირი დაჯარიმდა, შვიდი პირი დაექვემდებარა ადმინისტრაციულ გაძევებას. შვიდი დამრღვევი გაფრთხილებულია, ადმინისტრაციული სამართალდარღვევის ფაქტზე მიმდინარეობს გამოძიება ათი პირის მიმართ, ხოლო ექვსი პირის მიმართ აღძრულია სისხლის სამართლის საქმე", - აღნიშნავენ უწყებაში.
დე ფაქტო რესპუბლიკის კაგებე ამ სტატისტიკაში ცალკე არ გამოყოფს საქართველოს მოქალაქეების დაკავების ფაქტებს. თუმცა მათ მიერ გავრცელებული განცხადებიდან ცხადი ხდება, რომ დეკემბერში საქართველოს 7 მოქალაქე გადასცეს ქართულ მხარეს - ცხინვალი ამას გაძევებას უწოდებს.
გარდა ამისა, 6 მოქალაქე სისხლის სამართლის პასუხისმგებლობას დაუქვემდებარეს და წინასწარი დაკავების იზოლატორში მოათავსეს. 55 დაკავებულიდან მხოლოდ 13-ია საქართველოს მოქალაქე, დანარჩენი კი ის ადამიანები არიან, რომლებიც ოკუპირებული ტერიტორიიდან საქართველოს ხელისუფლების კონტროლირებულ ტერიტორიაზე გადმოსვლას ან ე.წ. სასაზღვრო ზონაში შესვლას ცდილობდნენ.
ამჟამად ცხინვალის წინასწარი დაკავების იზოლატორში საქართველოს 6 მოქალაქე იმყოფება. მათ ორთვიანი წინასწარი პატიმრობა აქვთ შეფარდებული. ლაშა ხეთერელის, მამუკა ჩხიკვაძის, თამაზ გოგიჩაშვილის, ზაზა მეგრელიშვილის, ვლადიმერ კანიაშვილის და კახა ნათაძის გათავისუფლების მოთხოვნით მოლაპარაკებები გრძელდება.
საქართველოს სახელმწიფო უსაფრთხოების სამსახურის მონაცემებით, 2021 წელს აფხაზეთის მიმართულებით 11 მოქალაქე დააკავეს, ხოლო ოკუპირებული ცხინვალის რეგიონში - 67.