კახის რაიონიდან სტუდენტებისთვის გამოგზავნილი პროდუქტი საქართველოს საზღვარზე არ შემოუშვეს
საქართველო-აზერბაიჯანის საზღვრის ლაგოდეხის მონაკვეთზე რამდენიმე დღის წინ მომხდარი ინციდენტი გააპროტესტეს. აქციის მონაწილეების თქმით, აზერბაიჯანში მდებარე ისტორიული ჰერეთიდან (საინგილო), კახის რაიონიდან მშობლებისა და პაპა-ბებიების მიერ საქართველოში მყოფი სტუდენტებისთვის გამოგზავნილი პროდუქტი ქართველმა მესაზღვრეებმა არ შემოუშვეს და შემომტანი იძულებული გახდა, ის ხევში გადაეყარა. ამის გამო აქცია 25 თებერვალს გაიმართა.
აქციის მონაწილე ნოდარ ბაჩალიაშვილის თქმით, პანდემიის გამო ორ წელზე მეტია საქართველო-აზერბაიჯანის საზღვრის ლაგოდეხის მონაკვეთი ჩაკეტილია და ერთადერთი საშუალება, რომ კახში მყოფებმა საქართველოში პროდუქტი გამოგზავნონ, სატრანზიტო მანქანებია.
„ქართველი მესაზღვრეების გამო ჰერეთელი ბებიებისა და პაპების ნაოფლარი წყალში გადაიყარა. საზღვარზე შემოვიდა ტრაილერის მძღოლი (მათთვის საზღვარი გახსნილია), რომელიც თვეში ორჯერ თუ მოდის კახიდან საქართველოში. მეზობლებმა მძღოლს საქართველოში გამოატანეს თითო ჩანთა საჭმელი სტუდენტისთვის! სულ იყო ალბათ 5 ჩანთა. აზერბაიჯანმა გამოატარა და პრობლემა შექმნა საქართველომ. თურმე ერთ მძღოლს რამდენიმე ჩანთის შემოტანის უფლება არ ჰქონდა. რადგან არ უშვებდნენ მძღოლი იძულებული გახდა, საჭმელი ხევში გადაეყარა“, - განაცხადა ნოდარ ბაჩალიაშვილმა.
რატომ არ მისცეს მესაზღვრეებმა უფლება სატრანზიტო ავტომობილის მძღოლს, სტუდენტებისთვის განკუთვნილი სურსათი საქართველოში შემოეტანა, განმარტება გააკეთა საბაჟო სამსახურის უფროსმა გიორგი ლომიძემ.
„მოხდა გაუგებრობა. მძღოლმა ვერ დაადეკლარირა სწორად მისი ნივთები, ვერ განაცხადა, რომ ეს ყველაფერი არ იყო მისი და გამოტანებული ჰქონდა, რომელსაც სხვადასხვა მიმღები ელოდებოდა საჭიროების მიხედვით. კანონის მიხედვით, ერთ პიროვნებას არ შეეძლო დიდი რაოდენობით ჩანთების შემოტანა, ამიტომ მივაბრუნეთ უკან. საბაჟოს არცერთ თანამშრომელს ის უკან არ მიუბრუნებია გადაყრის ან განადგურების მიზნით”, - თქვა გიორგი ლომიძემ.
პანდემიის გამო უკვე ორი წელია საქართველო-აზერბაიჯანის საზღვრის ლაგოდეხის მონაკვეთიდან აზერბაიჯანში შესვლა შეუძლებელია. საბაჟო სამსახურის უფროსმა განმარტა, რომ საქართველოს მხრიდან საზღვარი გახსნილია, თუმცა ჩაკეტილი აქვს აზერბაიჯანს.