აქცია "შინ ევროპისკენ" მონაწილეები ღამეს მთავრობის ადმინისტრაციის შენობასთან გაათენებენ
აქცია "შინ ევროპისკენ" დარჩენილი რამდენიმე ათეული მონაწილე ღამეს მთავრობის ადმინისტრაციასთან გაათენებს. მანამდე ისინი რამდენიმე ასეულ მეტრში, საქართველოს პარლამენტის შენობასთან იყვნენ.
"ჩვენ თავიდანვე მოვუწოდეთ მოსახლეობას, ვისაც შეეძლო დარჩენა, წამოსულიყო ჩვენთან ერთად... მნიშვნელოვანია, რომ ამ პროტესტს მოჰყვეს შედეგი და იყოს ხალხმრავალი. ვისაც არ შეგიძლიათ ღამის გათენება, გელოდებით დილით", - თქვა აქციის ერთ-ერთმა ორგანიზატორმა, გიგა მაქარაშვილმა.
დღეს, 3 ივლისს თბილისში, რუსთაველის გამზირზე რამდენიმე ათასი ადამიანი აქციაზე "შინ ევროპოსკენ" შეკრიბა. აქციის ერთ-ერთი მთავარი მოთხოვნაა გადადგეს საქართველოს პრემიერ-მინისტრი და მთავრობა.
დაახლოებით 22:30 საათისთვის აქციის მონაწილეთა ნაწილი პარტია "ქართული ოცნების" ოფისისკენ ორგანიზაცია "დემოკრატიის მცველების" დამფუძნებლის, გიორგი მშვენიერაძის მოწოდების შემდეგ დაიძრა.
მათ იქ ათეულობით პოლიციელი დახვდათ, რომლებსაც "ქართული ოცნების" ოფისისთვის ალყა ჰქონდათ შემორტყმული.
ერთ-ერთი გეგმა, რომელიც ამავე მოძრაობის კიდევ ერთმა ლიდერმა, შოთა დიღმელაშვილმა გააცნო აქციის მონაწილეებს, მთავრობის ადმინისტრაციის შენობასთან გადანაცვლებაა.
ეს იყო მესამე აქცია, რომელსაც სახალხო მოძრაობა "შინ ევროპისკენ" მართავდა. წინა ორმა აქციამ ათიათასობით ადამიანი შეკრიბა, მონაწილეთა მნიშვნელოვანი რაოდენობა ახალგაზრდები იყვნენ, საპროტესტო აქციას თბილისის 15-მდე უმაღლესი სასწავლებლის სტუდენტებმა დაუჭირეს მხარი.
საქართველოს პარლამენტის თავმჯდომარემ შალვა პაპუაშვილმა 28 ივნისს პარლამენტში გამართულ ბრიფინგზე განაცხადა, რომ სამოქალაქო საზოგადოების მოთხოვნა პრემიერ-მინისტრის გადადგომისა და ეროვნული თანხმობის მთავრობის ჩამოყალიბების შესახებ, სხვა არაფერია, თუ არა ძალაუფლების მიტაცების კიდევ ერთი სურვილი.