უკრაინა გმობს რუსეთის საელჩოს ტექსტს ტვიტერზე, რომელიც გამოდის აზოვის მცველთა "დამამცირებელი" სიკვდილის მოწოდებით
![უკრაინა გმობს რუსეთის საელჩოს ტექსტს ტვიტერზე, რომელიც გამოდის აზოვის მცველთა](https://gdb.rferl.org/69DD8A3C-61C1-4C38-9399-0D7EC73AE4DA_w800_h450.jpg)
უკრაინის ოფიციალურმა პირებმა დაგმეს ბრიტანეთში რუსეთის საელჩოს მიერ ტვიტერით გამოქვეყნებული ტექსტი, რომელიც გამოდის აზოვის დანაყოფის წევრთა "დამამცირებელი" სიკვდილისკენ მოწოდებით.
ტვიტერზე რუსული ტექსტი გამოქვეყნდა რამდენიმე საათში მას შემდეგ, რაც აღმოსავლეთ უკრაინაში, რუსეთის მიერ მხარდაჭერილი სეპარატისტების კონტროლის ქვეშ მყოფ დონეცკის რეგიონში, საპატიმროს კომპლექსზე განხორციელდა შეტევა. გავრცელებული ცნობებით, დაიღულა ათობით უკრაინელი ომის ტყვე, მათ შორის აზოვის დანაყოფის წევრები.
რუსეთი აცხადებს, რომ ოლენივკის ციხეზე დარტყმა განახორციელა უკრაინის არმიამ, აშშ-ის მიერ მიწოდებული სარაკეტო იარაღით.
უკრაინის არმია აცხადებს, რომ იმ არეალში სარაკეტო ცეცხლი არ გაუხსნია. უკრაინა რუსეთის ძალებს სდებს ბრალს ციხის დაბომბვაში, იქ მყოფი უკრაინელების წამების და სიკვდილით დასჯის შემთხვევების დამალვის მიზნით.
ტვიტერზე გამოქვეყნებულ ტექსტში ბრიტანეთში რუსეთის საელჩო წერს - "აზოვის სამხედროები სიკვდილით დასჯას იმსახურებენ, მაგრამ არა ცეცხლსასროლი იარაღით შეიარაღებული დანაყოფისგან, არამედ ჩამოხრჩობით, რადგან ისინი არ არიან ნამდვილი ჯარისკაცები. ისინი დამამცირებელ სიკვდილს იმსახურებენ".
ტვიტერი აცხადებს, რომ საელჩომ მისი წესები დაარღვია "სიძულვილით წარმართული ქცევით", თუმცა ამ ტექსტს ტვიტერმა გაფრთხილება დაურთო და არ წაუშლია.
ანდრეი იერმაკი, უკრაინის პრეზიდენტის ოფისის ხელმძღვანელი, რუსეთს "ტერორისტულ სახელმწიფოს" უწოდებს.
"21-ე საუკუნეში მხოლოდ ველურებს და ტერორისტებს შუეძლიათ დიპლომატიურ დონეზე იმაზე ილაპარაკონ, რომ ადამიანები ჩამოხრჩობით სიკვდილს იმსახურებენ. რუსეთი ტერორიზმის სახელმწიფო მხარდამჭერია. კიდევ რა მტკიცებულებაა საჭირო?" - წერს იერმაკი ტელეგრამით.
უკრაინის საგარეო საქმეთა სამინისტროს პრესმდივანმა, ოლეგ ნიკოლენკომ ტვიტერით დაწერა - "განსხვავება არ არის რუსი დიპლომატების მხრიდან უკრაინელი პატიმრების სიკვდილით დასჯის მოწოდებასა და ამ ქმედებას შორის, რომელსაც რუსეთის სამხედროები საპატიმროში ახორციელებენ. ამ დანაშაულთა ომში ყველანი მოკავშირეები არიან და პასუხი უნდა აგონ".
უკრაინის ძალებმა, მათ შორის აზოვის დანაყოფის წევრებმა, მაისში დაასრულეს მარიუპოლის აზოვსტალის ქარხნის შენობის დაცვა და ჩაბარებას დათანხმდნენ. 2500-მდე მებრძოლი მოსკოვის ძალებმა ჩაიგდეს ტყვედ.
აზოვის დანაყოფი უწინ მოხალისეთა ბატალიონი იყო, რომელიც კრიტიკას იწვევდა ულტრამემარჯვენე ძალებთან კავშირების გამო. 2014 წელს ჯგუფი ოფიციალურად გახდა უკრაინის ეროვნული გვარდიის წევრი, და მისი წევრები უკრაინის ძალებთან ერთად ებრძოდნენ რუსეთის მიერ მხარდაჭერილ სეპარატისტებს აღმოსავლეთში, დონეცკისა და ლუგანსკის რეგიონებში.