“რუსეთს უნდა ომი და არა დასავლეთს, ნუ გაავრცელებ სიცრუეს…”
“რუსეთს უნდა ომი და არა დასავლეთს, ნუ გაავრცელებ სიცრუეს, დეზინფორმაცია შეურაცხყოფს გმირთა ხსოვნას”, მსგავსი შინაარსის ბანერები თბილისის მეტროში გუშინ განათავსეს. ბანერები კოალიცია ინფორმაციის სანდოობისთვის ეკუთვნის. როგორც ორგანიზაციაში გვითხრეს ბანერების განთავსება ერთიანი კამპანიის ნაწილია, რომლის ფარგლებშიც სხვა ღონისძიებებიც იგეგმება.
ბანერები ჯამში ხუთ მეტროსადგურში: რუსთაველი, თავისუფლება, ახმეტელსა და სადგურის მოედანზე განთავსდა.
კოალიცია ინფორმაციის სანდოობისთვის გასულ წელს შეიქმნა და ის შემდეგ ორგანიზაციებს აერთიანებს: ინფორმაციის თავისუფლების განვითარების ინსტიტუტი (IDFI), iFact, მედიის განვითარების ფონდი (MDF), ომისა და მშვიდობის გაშუქების ინსტიტუტი (IWPR), სამართლიანი არჩევნებისა და დემოკრატიის საერთაშორისო საზოგადოება (ISFED), საქართველოს ჟურნალისტური ეთიკის ქარტია, საქართველოს რეფორმების ასოციაცია (GRASS), ტოლერანტობისა და მრავალფეროვნების ინსტიტუტი (TDI).
როგორც დამფუძნებელ განცხადებაში ვკითხულობთ მისი მიზანია საზოგადოებაში დეზინფორმაციისა და ანტიდასავლური პროპაგანდის მიმართ ცნობიერების ამაღლება და აღნიშნული საფრთხეების საპასუხოდ საერთო ეროვნული და საზოგადოებრივი მიდგომის ჩამოყალიბებაა.
