გია ხუხაშვილი: „ქართული ოცნებიდან“ წასულ ოთხეულს საბოლოო ჯამში უხარისხო ვირეშმაკული თამაში გამოუვიდათ
“„ქართული ოცნებიდან“ წასულ ოთხეულს საბოლოო ჯამში უხარისხო ვირეშმაკული თამაში გამოუვიდათ”, – ამის შესახებ ექსპერტმა პოლიტიკის საკითხებში გია ხუხაშვილმა განაცხადა.
გია ხუხაშვილი „ქართული ოცნებიდან“ გასული ოთხეულის ქმედებებს, ცუდ სპექტაკლებს უწოდებს.
ამასთან, ხუხაშვილს არ აქვს იმედი, რომ „ოცნება“ დასავლეთზე შეტევას შეწყვეტს.
„ეს ოთხეული რეალურად არ გასულა „ქართული ოცნებიდან“, აბსოლუტური სინქრონი არსებობს მათ შორის, არც მალავენ ამას. მათ საბოლოო ჯამში უხარისხო ვირეშმაკული თამაში გამოუვიდათ. სიმართლე გითხრათ, ამ პოლიტტექნოლოგიის არ მჯერა. ყველამ ყველაფერი კარგად იცის, მაგრამ ჯიუტად რაღაცას აგრძელებენ, პარტიულ სხდომებსაც ესწრებიან და მერე ხსნიან იმით, თურმე ეს არის უმრავლესობა ორსუბიექტიანი, მოკლედ ასეთი პროვინციული ნაჯახით ნამუშევარი ტექნოლოგიაა. ჩვენც ვუყურებთ ამ ყველაფერს, ამ ქვეყანაში სხვა გასართობი არ არის და იძულებული ვართ, არაპროფესიონალი მსახიობების მიერ ნათამაშები, არც თუ კარგი სპექტაკლები ვიხილოთ პრაქტიკულად ყოველ დღე.
პირველი შეტევა განხორციელდა ამერიკის ელჩზე და აშშ-ზე შეტევა იყო მასირებული და ამაში არამხოლოდ ოთხეული მონაწილეობდა, არამედ ხელისუფლებაც ჩართული იყო მათთვის გარკვეული ფონის შექმნაში. ამან სერიოზული ზიანი მიაყენა ჩვენი განვითარების ვექტორს, საზოგადოების განწყობებს. ეს ისტორია ახლა რაღაცნაირად შედარებით მინავლებისკენ წავიდა. თუმცა, ვერ გეტყვით ხვალ და ზეგ რა მოხდება, შეიძლება განაახლონ შეტევები. განცდა იმისა, რომ დასავლეთზე შეტევას „ქართული ოცნება“ შეწყვეტს ნამდვილად არ მაქვს“, – აცხადებს გია ხუხაშვილი.
ექსპერტ გია ხუხაშვილის განცხადებით, მმართველი გუნდის მთავარი ამოცანა ხელისუფლების და ძალაუფლების შენარჩუნებაა.
ხუხაშვილი მიიჩნევს, რომ ხელისუფლებისთვის გიორგი გახარია გარკვეული რისკია და ამბობს, რომ სწორედ ამის გამო დაიწყეს მისი გაშავება და ამერიკის აგენტად მოხსენიება.
მისი თქმით, „ოცნებას“ გახარია დისკომფორტს უქმნის.
„ჩვენი ხელისუფლების ერთადერთი ამოცანა – ძალაუფლების შენარჩუნება და ისინი წინასწარ ფიქრობენ თუ რა რისკები შეიძლება, გაჩნდეს მომავალში. მათთვის გიორგი გახარია, როგორც ჩანს საკმაოდ სერიოზული დისკომფორტის შემქმნელია. ამაში არის გარკვეული ლოგიკა, გამომდინარე იქიდან, რომ ტექნოლოგია, რომელსაც ისინი ქვეყანას მართავენ არის ორპოლუსიანი – ვართ ჩვენ და ყველა დანარჩენი არის „ნაციონალური მოძრაობის“ წარმომადგენელი. გახარია არ ჯდება ამ მოდელში ანუ მათ ვერ მოახერხე მისი შეტენვა თავის მოწინააღმდეგის ბანაკში.
გამომდინარე იქიდან, რომ ამომრჩევლის უმრავლესობა დღეს არის არჩევანის გარეშე და მას არ უნდა არც წარსული ენმ-ს სახით და არც აწმყო მოსწონს „ოცნების“ სახით და ეძებს მომავლის არჩევანს, მათ ჩათვალეს, გარკვეული რისკია ამ ამომრჩევლით გარკვეული აქტივი შექმნას გახარიამ და წინასწარ ამზადებენ რაღაც ისტორიებს. გახარიას აცხადებენ ამერიკის აგენტად. ძალიან სახიფათო თამაშები დაიწყეს სახელმწიფოებრივადაც“, – დასძენს ექსპერტი პოლიტიკის საკითხებში.