ბაიდენი: რუსეთმა უკრაინაში "უსირცხვილოდ დაარღვია" გაეროს ქარტია
უკრაინაში რუსეთის შეჭრის მკაცრად დაგმობისას, ბაიდენმა "სისხლისგამყინავი" უწოდა ცნობებს რუსეთის მიერ უკრაინაში სამოქალაქო პირების წინააღმდეგ ჩადენილ დანაშაულებზე. ბაიდენის თქმით, ევროპის მიმართ რუსეთის პრეზიდენტის, ვლადიმირ პუტინის ახალი ბირთვული მუქარა აჩვენებს "თავზეხელაღებულ უგულებელყოფას" პასუხისმგებლობებისა, რომლებიც რუსეთს ეკისრება, როგორც ბირთვული იარაღის გაუვრცელებლობის ხელშეკრულების ხელმომწერს.
ბაიდენმა რუსეთი გააკრიტიკა ყალბი რეფერენდუმების დანიშვნისთვის ტერიტორიებზე, რომლებიც მან ძალით წაართვა უკრაინას.
"გაეროს უშიშროების საბჭოს მუდმივი წევრი შეიჭრა მის მეზობელ ქვეყანაში, შეეცადა რუკიდან დაეშალა სუვერენული სახელმწიფო. რუსეთმა უსირცხვილოდ დაარღვია გაეროს ქარტიის მთავარი პრინციპები" - უთხრა ბაიდენმა გაეროში თავშეყრილ აუდიტორიას.
ბაიდენმა ყველა ქვეყანას - დემოკრატიებსაც და ავტოკრატიებსაც - მოუწოდა გააკრიტიკონ რუსეთის "სასტიკი, არასჭირო ომი" და უკრაინას დაეხმარონ დაიცვას საკუთარი თავი.
"ჩვენ სოლიდარულად ვიდგებით რუსეთის აგრესიის წინააღმდეგ. წერტილი" - თქვა ბაიდენმა.
ბაიდენმა ასევე ილაპარაკა უკრაინაში რუსეთის შეჭრის შედეგებზე საკვების მიწოდების ქსელისთვის და გამოვიდა 2.9 მილიარდი დოლარის გაღების დაპირებით საკვების უსაფრთხოებისთვის, საიმისოდ, რომ პასუხი გაეცეს ომით გამოწვეულ საკვების დეფიციტს და კლიმატის ცვლილებებს. ბაიდენმა შეაქო გაეროს შუამავლობით მიღწეული დერეფანი, რომელიც შესაძლებელს ხდის უკრაინის მარცვლეულის ზღვით ექსპორტს და განაცხადა, რომ შეთანხმება ძალაში უნდა დარჩეს, მიმდინარე კონფლიქტის მიუხედავად.