TI-ის შეფასებით, კორუფციის შესახებ ახალი კანონპროექტი ევრორეკომენდაციას არ უპასუხებს
"საერთაშორისო გამჭვირვალობა-საქართველო" მიიჩნევს, რომ მმართველი პარტიის მიერ შემუშავებული ახალი კანონპროექტი, რომლითაც "ანტიკორუფციული ბიურო" უნდა შეიქმნას, ევროკავშირის რეკომენდაციას არ უპასუხებს. ორგანიზაციის შეფასებით, დაგეგმილი რეფორმა თავს არ უყრის სხვადასხვა საკვანძო ანტიკორუფციულ ფუნქციას, არ უზრუნველყოფს რეალური დამოუკიდებლობის გარანტიის შექმნას და ხელს არ უწყობს მაღალი დონის კორუფციის შემთხვევების წინააღმდეგ ბრძოლას.
"ის გულისხმობს, მხოლოდ და მხოლოდ, მთავრობის ადმინისტრაციაში ამჟამად არსებული ეროვნული ანტიკორუფციული საბჭოს სამდივნოს ფუნქციების ცალკე სსიპ-ად გამოყოფას, რაც აცდენილია ევროკომისიის მოთხოვნას. გარდა ამისა, გამოცხადებული რეფორმა არ პასუხობს კორუფციასთან დაკავშირებით ქვეყნის წინაშე არსებულ გამოწვევებს – მაღალი დონის კორუფციის ზრდასა და სახელმწიფოს მიტაცების გაღრმავებას.
შესაბამისად, მხოლოდ შემოთავაზებული რეფორმის გატარება ვერ ჩაითვლება რეკომენდაციის შესრულებად, რამაც შეიძლება ქვეყანას დააკარგვინოს კანდიდატის სტატუსის მოპოვების შესაძლებლობა", - აღნიშნავენ არასამთავრობო ორგანიზაციაში.
"საერთაშორისო გამჭვირვალობა-საქართველოში" აცხადებენ, რომ ევროკავშირის მეოთხე რეკომენდაცია შესრულდებოდა, თუ მმართველი პარტია ოპოზიციისა და ამავე ორგანიზაციის მიერ 2020 წელს ერთობლივად შემუშავებულ დოკუმენტს დაუჭერდა მხარს:
დამოუკიდებლობის გარანტია – "სააგენტოს ხელმძღვანელი შეირჩევა მაღალი პოლიტიკური კონსენსუსით, პარლამენტის შემადგენლობის 2/3-ით, რაც უზრუნველყოფს დამოუკიდებელი ადამიანის დანიშვნას";
მაღალი დონის კორუფციაზე რეაგირება – "სააგენტო აღჭურვილია საგამოძიებო უფლებამოსილებით და მას პირდაპირ ევალება კორუფციასთან, მათ შორის მაღალი დონის კორუფციასთან ბრძოლა";
საკვანძო ანტიკორუფციული ფუნქციების გაერთიანება – "სააგენტო იქმნება ამჟამად სხვადასხვა ინსტიტუციებში გაფანტული ანტიკორუფციული საქმიანობით დაკავებული დეპარტამენტების გაერთიანებით (სუსი, აუდიტის სამსახურის პოლიტიკური ფინანსების დეპარტამენტი, საჯარო სამსახურის ბიუროს ქონებრივი დეკლარაციების დეპარტამენტი)".
"2022 წლის ბოლომდე ჯერ კიდევ რჩება საკმარისი დრო იმისათვის, რომ სრულყოფილად დაკმაყოფილდეს საქართველოსთვის ევროკომისიის მიერ მიცემული რეკომენდაციები, რაც ქვეყანას ევროკავშირის წევრობის კანდიდატის სტატუსს მოუტანს და განამტკიცებს მის დემოკრატიულ მომავალს", - აცხადებენ ორგანიზაციაში.
მმართველმა პარტიამ, "ქართულმა ოცნებამ", ანტიკორუფციული ბიუროს შექმნის კანონპროექტზე მუშაობა დაამთავრა. პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა მედიას 26 ოქტომბერს უთხრა, რომ პროცესი გამჭვირვალე იყო.
მისი თქმით, ანტიკორუფციული ბიუროს უფროსის კანდიდატურებს ღია კონკურსის საფუძველზე შეარჩევს სახელმწიფო უწყებებისა და სამოქალაქო საზოგადოების წარმომადგენლების მონაწილეობით შექმნილი საკონკურსო კომისია და თანამდებობაზე დასანიშნად საქართველოს პრემიერ-მინისტრს წარუდგენს.
ანტიკორუფციული სააგენტოს საქმიანობის გაძლიერება, ევროკავშირის წევრობის კანდიდატის სტატუსის მისაღებად საქართველოსთვის განსაზღვრული ერთ-ერთი რეკომენდაციაა. ქვეყანას სულ 12 რეკომენდაცია აქვს შესასრულებელი.