კახა გოგოლაშვილი: თუ ბელარუსი დასავლეთ უკრაინაში ჯარებს შეიყვანს და ლოგისტიკურ გზებს გადაკეტავს, უკრაინის ოცნება ახდება და …
„თუ ბელარუსი დასავლეთ უკრაინაში ჯარებს შეიყვანს და ლოგისტიკურ გზებს გადაკეტავს, მაშინ ნატო უკრაინის ცას ჩაკეტავს“, – ამის შესახებ „რონდელის ფონდის“ ხელმძღვანელმა კახა გოგოლაშვილმა „პალიტრანიუსის“ ეთერში სტუმრობის დროს განაცხადა.
მისი თქმით, მეორე ფრონტი ძალიან სჭირდება რუსეთს და არსებობს იდეა, რომ ბელარუსის ჯარი შეიძლება უკრაინაში შეიჭრას
„ბელარუსი ხან იწყებს ომს უკრაინასთან, ხან არ იწყებს. თუ ბელარუსი გახსნის მეორე ფრონტს, ძალიან სწრაფად მოხდება მისი ჯარების დიდი ნაწილის ჩაბარება ტყვედ უკრაინელებზე.
ასეთი იდეა, რა თქმა უნდა, არსებობს, რომ ბელარუსის ჯარი უკრაინაში შეიჭრას. მეორე ფრონტი ძალიან სჭირდება რუსეთს ამ მომენტისთვის. ყველა საუბრობდა იმაზე, რომ ბელარუსმა შეიძლება შეუტიოს კიევს, რატომღაც ვფიქრობ, რატო შეუტევს ბელარუსი კიევს, რომელიც ძალიან დაცულია. უფრო შესაძლებელია, რომ ბელარუსმა შეუტიოს დასავლეთ უკრაინისკენ და გადაკეტოს ლოგისტიკური გზები პოლონეთიდან. მაგალითად, ლვოვი-კიევის რკინიგზა. ყველა ის გზა, რაც ჩრდილო-დასავლეთ უკრაინაში მდებარეობს გადაკეტოს.
უკრაინაში ძალიან კარგად მოქმედებს ჰაერსაწინააღმდეგო საშუალებები. ამიტომ ურჩევნია რუსებს მოხდეს ტერიტორიის ოკუპირება. უკრაინისთვის ლოგისტიკის შეწყვეტის შემთხვევაში პრაქტიკულად შეუძლებელი იქნება თავდაცვის ორგანიზება. ეს შესაძლებლობა არსებობს და თუ ეს განხორციელდა, მაშინ უკრაინა იქნება კედელთან მიყენებული და როგორც მინიმუმ პოლონური ჯარი მოახდენს ინტერვენციას, რომ დაიცვას გზები. ისინი ისევ განაცხადებენ, რომ რუსეთთან ომის დაწყებას არ აპირებენ, მაგრამ აპირებენ დაიცვან ლოგისტიკური გზები, დაიცვან ჰაერი.
შემდეგ უკვე ალბათ საზღვარზეც გადმოვლენ და ახდება უკრაინის ოცნება, რომ ნატომ ჩაკეტოს უკრაინის ცა, როგორც მინიმუმ დასავლეთ უკრაინის. ალბათ დნეპრის მარჯვენა სანაპირომდე შეიძლება მოხდეს ეს კონტროლი, ხოლო აღმოსავლეთ მხარეს ის ბრძოლა, რომელიც მიმდინარეობს მხოლოდ უკრაინელებსა და რუსებს შორის, გაგრძელდება“, – აცხადებს „რონდელის ფონდის“ დირექტორი.