გერმანია: ევროკავშირის სანქციების სამიზნე იქნება ირანის რევოლუციის გუშაგთა "შიდა წრე"
ევროკავშირის ახალი სანქციები მიზანში ამოიღებს "ძალაუფლების შიდა წრეს" ირანის რევოლუციის გუშაგთა კორპუსში, განაცხადა გერმანიამ 14 ნოემბერს. ბლოკი შეხვედრას მართავს, რათა შეიმუშაოს ზომები თეირანის მხრიდან მშვიდობიანი დემონსტრანტების წინააღმდეგ მიმართული რეპრესიების პასუხად.
აქციები, რომლებსაც ბიძგი მისცა მორალის პოლიციის მიერ ჰიჯაბის ტარების წესების დარღვევის გამო დაპატიმრებული ქალის, მაჰსა ამინის სიკვდილმა, ერთ-ერთ ყველაზე მასშტაბური გამოწვევაა ისლამური რესპუბლიკისთვის, 1979 წლის რევოლუციის შემდეგ. "როიტერსი" აქტივისტურ სააგენტოზე, HRANA-ზე დაყრდნობით იუწყება, რომ მღელვარების შედეგად ამ დრომდე დაიღუპულია 336-მდე დემონსტრანტი, დააკავეს 15 100-მდე პირი.
"შევიმუშავებთ სანქციათა კიდევ ერთ პაკეტს, რათა მკაფიო შეტყობინება გავუგზავნოთ მათ, ვინც მიიჩნევს, რომ შედეგების გარეშე შეუძლიათ შეზღუდონ, ზეწოლა განახორციელონ და დახოცონ საკუთარი ხალხი, - უთხრა გერმანიის საგარეო საქმეთა მინისტრმა ანალენა ბერბოკმა ჟურნალისტებს ბრიუსელში, ევროკავშირის ქვეყნების საგარეო საქმეთა მინისტრების შეხვედრის დაწყებამდე და დასძინა, - მათ ეს არ შეუძლიათ. მათ ევროპა ადევნებს თვალს".
ბერბოკის თქმით, ახალი სანქციების განსაკუთრებული სამიზნე იქნება რევოლუციის გუშაგთა კორპუსის შიდა წრე და ის სტრუქტურები, რომლებიც მათ აფინანსებენ.
სანქციების პირველი პაკეტი ოქტომბერში იქნა შემოღებული, რითაც ევროკავშირმა მოგზაურობა აუკრძალა და ქონება გაუყინა ირანის 15 ინდივიდსა და ინსტიტუტს, რომლებსაც კავშირი ჰქონდათ მაჰსა ამინის სიკვდილთან და დემონსტრაციებზე განხორციელებულ ზეწოლასთან.