სომხეთში რუსეთის სამხედრო ბაზასთან დემონსტრაციის დროს ასამდე პირი დააკავეს
სომხეთის პოლიტიკური მოძრაობა, „ეროვნული დემოკრატიული პოლუსი“ იტყობინება, რომ მისი მიერ რუსეთის სამხედრო ბაზასთან, ქალაქ გიუმრიში მოწყობილი საპროტესტო აქციის დროს დააკავეს ასამდე პირი.
დემონსტრანტებმა, რომლებიც აქციას მართავდნენ ლოზუნგით: „ბლოკადა განბლოკვის სახელით,“ რუსეთის სამხედრო ბაზასთან მიმავალი გზა გადაკეტეს. მათი მოთხოვნაა, რომ რუსეთის სამხედრო-სამშვიდობო კონტინგენტმა აღადგინოს მოძრაობა ლაჩინის დერეფანში, რომელიც სომხეთს აკავშირებს აზერბაიჯანის რეგიონთან, თვითგამოცხადებულ მთიან ყარაბაღთან.
თუ რუსეთის სამშვიდობო ძალები არ იმოქმედებენ აქტიურად, დემონსტრანტები მზად არიან ისინი „ოკუპანტებად“ გამოაცხადონ. „მთელ მსოფლიოს ვაჩვენებთ, რომ სომხეთი, არცახის (მთიანი ყარაბაღის რეგიონის სომხური დასახელება) ჩათვლით, 102 ბაზის სახით, რუსეთის მიერ არის ოკუპირებული,“ -განაცხადა "ეროვნული დემოკრატიული პოლუსის“ წევრმა, გაჰე გასპარიანმა.
ლაჩინის დერეფანი ერთადერთი გზაა, რომელიც მთიან ყარაბაღს სომხეთთან აკავშირებს. სომხეთსა და აზერბაიჯანს შორის 2020 წლის ომის შემდეგ დადებული შეთანხმებით, ლაჩინის დერეფანს აკონტროლებს ბაქო, ხოლო მას მეთვალყურეობას უწევენ რუსეთის სამშვიდობო ძალები.
დეკემბრის შუა რიცხვებში, გზა, რომელიც მთიან ყარაბაღს სომხეთთან აკავშირებს, დაბლოკა აზერბაიჯანელი დემონსტრანტების ჯგუფმა, რომელიც მოითხოვს, ბაქოს საშუალება მიეცეს, გააკონტროლოს ყარაბაღში მდებარე ბუნებრივი წიაღისეულის საბადოები. დემონსტრანტები თანახმად, მთიანი ყარაბაღის საბადოებში უკანონო სამუშაოები მიმდინარეობს და რომ ბუნებრივი რესურსები სომხეთში ლაჩინის დერეფნით გააქვთ.
ერევანი ამტკიცებს, რომ ლაჩინის დერეფნის გზის გადაკეტვის შემდეგ მთიანი ყარაბაღი ვეღარ იღებს სასიცოცხლო მნიშვნელობის პროდუქტს, რომ რეგიონი ჰუმანიტარული კატასტროფის წინაშეა.
საერთაშორისო სამართლით, მთიანი ყარაბაღი აზერბაიჯანის ტერიტორიაა. 1990 წლებიდან მას სომხური ძალები აკონტროლებდნენ. 2020 წლის სამხედრო კონფლიქტს შემდეგ გაფორმდა შეთანხმება, რომლის თანახმად, აზერბაიჯანმა დაიბრუნა კონტროლი რეგიონის დიდ ნაწილზე და იქ განთავსდა რუსეთის სამშვიდობო ძალები.