ესებუა სასამართლომ დამნაშავედ ცნო იარაღის უკანონო შეძენა-შენახვა-ტარებისთვის
ზუგდიდის რაიონულმა სასამართლომ 4 წლით პატიმრობა შეუფარდა "საქართველოს ბანკის" ზუგდიდის ფილიალზე თავდასხმის საქმეზე ბრალდებულ ბადრი ესებუას, მისდამი დამატებით წარდგენილი ბრალისთვის - იარაღის უკანონო შეძენა-შენახვა-ტარებისთვის.
მოსამართლე შოთა ბიჭიამ არ გაითვალისწინა პროკურორების შუამდგომლობა, რომელიც ითვალისწინებდა წარდგენილი მუხლით გათვალისწინებულ მაქსიმალურ სასჯელს - 6 წლით პატიმრობას. დაცვის მხარე კი მინიმალურს, 3 წლით პატიმრობას ითხოვდა.
თავად ბადრი ესებუამ სხდომაზე აღიარა, რომ დაკავებისას თან ჰქონდა ცეცხლსასროლი იარაღი, თუმცა დაამატა, რომ ეს დანაშაული არ არის:
"დამნაშავედ რამდენად ვცნობ თავს, არ ვიცი, მაგრამ იარაღი ჩემი იყო და დანაშაული არ ჩამიდენია, მე ასე ვფიქრობ“, - განაცხადა ბადრი ესებუამ.
პროკურორ დიმიტრი ხვიტიას განცხადებით, საქმეში არსებული მტკიცებულებებით, მათ შორის მოწმეების ჩვენებებით დასტურდება, რომ ბრალდებულს 8 თებერვალს დაკავებისას თან ჰქონდა უკანონო ცეცხლსასროლი იარაღი.
ადვოკატმა იოსებ ჯანაშიამ საპასუხოდ განმარტა, რომ მისი დაცვის ქვეშ მყოფს გადაკეთებული სპორტული იარაღი ჰქონდა თავდაცვის მიზნით, რადგან მასზე ძებნა იყო გამოცხადებული.
მანვე აღნიშნა, რომ ესებუას იარაღი არ გამოუყენებია და დანაშაული არ ჩაუდენია.
ადვოკატის თქმით, ბრალდებული აღიარებს ბრალს, რითაც თანამშრომლობს გამოძიებასთან, რაც განაჩენისას გათვალისწინებული უნდა ყოფილიყო.
მოსამართლე შოთა ბიჭიას განცხადებით, რადგან წინა სასამართლო სხდომაზე დაცვის მხარემ უდავოდ ცნო პროკურატურის ყველა მტკიცებულება, დღეს არ მოხდა მათი გამოკვლევა. შესაბამისად, სასამართლომ მხარეების დასკვნითი სიტყვები მოისმინა.
"საქართველოს ბანკის" ზუგდიდის ფილიალზე თავდასხმის საქმეზე ბრალდებულ ბადრი ესებუას 2023 წლის 9 თებერვალს პროკურატურამ კიდევ ერთი ბრალი ცეცხლსასროლი იარაღისა და საბრძოლო მასალის შეძენა-შენახვის მუხლით წარუდგინა. რაც შეეხება “საქართველოს ბანკის" ზუგდიდის ფილიალში 2020 წლის 21 ოქტომბერს მომხდარ თავდასხმის საქმეს, რომელშიც ბრალდებული ბადრი ესებუაა, განხილვა გრძელდება. მორიგი სხდომა 6 აპრილს არის დანიშნული.
2-წლიანი ძებნის შემდეგ ბადრი ესებუას დაკავება შსს-მ 8 თებერვალს, დილით დაადასტურა. იგი ზუგდიდის სოფელ ჯიხაშკარში, ნათესავის სახლში დააკავეს. ბადრი ესებუა ტერორისტული აქტის, ტერორისტული მიზნით მძევლად ხელში ჩაგდების, ცეცხლსასროლი იარაღის, საბრძოლო მასალისა და ასაფეთქებელი მოწყობილობის მართლსაწინააღმდეგო შეძენა-შენახვა-ტარების ბრალდებითაა დაკავებული.