ზელენსკი კახოვკის ჰეს-ის განადგურებაზე: რუსეთმა ააფეთქა მასობრივი ეკოლოგიური განადგურების ბომბი
უკრაინის პრეზიდენტმა ვოლოდიმირ ზელენსკიმ „ბუქარესტის ცხრიანის“ სამიტზე გამოსვლისას (რომელიც აერთიანებს ნატოს წევრ ცენტრალური და აღმოსავლეთ ევროპის ქვეყნებს) რუსეთი კახოვკის ჰიდროელექტროსადგურის დანაღმვასა და აფეთქებაში დაადანაშაულა.
„სამწუხაროდ, უკვე წელიწადზე მეტია, რუსეთი აკონტროლებს როგორც კაშხალს, ასევე მთელს კახოვკის ჰესს. ფიზიკურად შეუძლებელია მისი როგორმე აფეთქება გარედან - დაბომბვით. იგი დანაღმული იყო. სწორედ რუსი ოკუპანტების მიერ დანაღმული და მათ მიერ აფეთქებული. რუსეთმა ააფეთქა მასობრივი ეკოლოგიური განადგურების ბომბი. ეს არის ადამიანის მიერ გამოწვეული ყველაზე დიდი ეკოლოგიური კატასტროფა ევროპაში ბოლო ათწლეულების განმავლობაში“, - განაცხადა უკრაინის პრეზიდენტმა ვოლოდიმირ ზელენსკიმ.
მანამდე კრემლის სპიკერმა დმიტრი პესკოვმა კახოვკის ჰიდროელექტროსადგურის განადგურებას უწოდა უკრაინის მიერ განხორციელებული დივერსიის შედეგი. პრორუსული ადმინისტრაციის წარმომადგენლები აცხადებენ, რომ კაშხალი რამდენიმეთვიანი დაბომბვის გამო დაინგრა.
მას მერე, რაც გავრცელდა ცნობები, რომ რუსეთის ჯარებმა 6 ივნისს დილით ადრე ააფეთქეს კახოვკის ჰიდროელექტროსადგურის ჯებირი, უკრაინის პრეზიდენტმა ვოლოდიმირ ზელენსკიმ ეროვნული უსაფრთხოებისა და თავდაცვის საბჭოს საგანგებო სხდომა მოიწვია.
„ეროვნული უშიშროების და თავდაცვის საბჭოს საგანგებო სხდომა გავმართე. ამ ღამით, 02:50-ზე, რუსმა ტერორისტებმა განახორციელეს კახოვკის ჰიდროელექტროსადგურის სტრუქტურების შიდა აფეთქება. წყალდიდობაში 80-მდე დასახლებაა. მიცემულია დავალება, ჩატარდეს ევაკუაცია სახიფათო რაიონებიდან და სასმელი წყლით იქნეს უზრუნველყოფილი ყველა ქალაქი და სოფელი, რომლებიც წყლით მარაგდებოდა კახოვკის წყალსაცავიდან“, - განაცხადა ზელენსკიმ სხდომის შემდეგ.
მისი თქმით, ხელისუფლება ყველაფერს აკეთებს მოსახლეობის გადასარჩენად - ჩართულია ყველა სამსახური, ჯარები, მთავრობა, პრეზიდენტის ადმინისტრაცია.
ეროვნული უსაფრთხოებისა და თავდაცვის საბჭოს წევრებს ასევე აცნობეს, რომ სულ მცირე 150 ტონა მანქანის ზეთი ჩაიღვარა მდინარე დნეპრში, არსებობს 300 ტონაზე მეტის გაჟონვის რისკი.
ამ დროისთვის სამოქალაქო და სამხედრო მსხვერპლი არ დაფიქსირებულა.
ასევე, სხდომაზე ეროვნული უსაფრთხოებისა და თავდაცვის საბჭო შეთანხმდა საერთაშორისო ზომების კომპლექსზე და უსაფრთხოების ზომებზე, რათა რუსეთმა პასუხი აგოს ამ „ტერაქტისთვის“.
კერძოდ, საუბარია გაეროს უშიშროების საბჭოს სხდომის მოწვევაზე, მიმართვაზე საერთაშორისო გარემოსდაცვითი ორგანიზაციებისადმი, სისხლის სამართლის საერთაშორისო სასამართლოში, რადგან, როგორც უკრაინული მხარე აღნიშნავს, რუსეთის ასეთი ქმედებები ჟენევის კონვენციის დარღვევის აშკარა ნიშნებს შეიცავს.