დააკავეს კაცი, რომელსაც ყოფილი ცოლის მოკვლა ედება ბრალად
პოლიციამ დააკავა 30 წლის კაცი, რომელსაც ყოფილი ცოლის განზრახ მკვლელობა ედება ბრალად. მას 16-დან 20 წლამდე ან უვადო პატიმრობა ემუქრება.
"ბრალდებულმა დანაშაულის დაფარვის მიზნით, ცხედარი, მეორე დღეს ნაქირავები ავტომობილის საბარგულში მოათავსა, გლდანის ციხის მიმდებარე ტერიტორიაზე მივიდა და ხევში გადააგო", - წერია შინაგან საქმეთა სამინისტროს მიერ 26 წლის ქალის მკვლელობის შესახებ გავრცელებულ ინფორმაციაში.
საქმეზე გამოძიება დაწყებულია საქართველოს სისხლის სამართლის კოდექსის 11 პრიმა 109-ე მუხლით - ოჯახის წევრის განზრახ მკვლელობის კვალიფიკაციით.
საქართველოს გენერალური პროკურატურის მონაცემებით, 2022 წელს 25 ქალი მოკლეს - 15 მკვლელობა ჩადენილია ოჯახური დანაშაულის, ხოლო 11 - არაოჯახური დანაშაულის ნიშნით.
37-ჯერ სცადეს ქალის მკვლელობა, საიდანაც 28 ოჯახური დანაშაულის ნიშნით იყო ჩადენილი.