"საქართველოს ბანკის" ქუთაისის ფილიალზე თავდამსხმელს 13-წლიანი პატიმრობა მიუსაჯეს
გრიგოლ ნარსიას, რომელიც 2022 წლის 20 სექტემბერს "საქართველოს ბანკის" ქუთაისის ფილიალზე თავდასხმისთვის დააკავეს, სასამართლომ 13-წლიანი პატიმრობა მიუსაჯა. განაჩენი ქუთაისის საქალაქო სასამართლოს მოსამართლე ქეთევან თხელიძემ გამოაცხადა.
გრიგოლ ნარსია 2022 წლის 20 სექტემბერს ბანკში შეჭრიდან თითქმის 10 საათის შემდეგ დააკავეს. მას მძევლად ჰყავდა აყვანილი 14 ადამიანი და ჯერ 2 მილიონ ამერიკულ დოლარს ითხოვდა, თუმცა მოგვიანებით თქვა, რომ 1,5 მილიონი უნდოდა. ის სამართალდამცავებსა და მედიასთან მძევლების დახმარებით ურთიერთობდა.
გრიგოლ ნარსიას ბრალი სისხლის სამართლის კოდექსის სამი მუხლით წაუყენეს: 236-ე (საბრძოლო მასალის უკანონოდ შეძენა-შენახვა-ტარება), 323-ე (ტერორისტული აქტი) და 329-ე (მძევლად ხელში ჩაგდება ტერორისტული მიზნით).