სარეკორდო მაჩვენებელს მიაღწია თურქეთში მყოფი რუსი იმიგრანტების რიცხვმა
თურქეთის ოფიციალური სტატისტიკური მონაცემებით, 2022 წელს, წინა წელთან შედარებით, ქვეყანაში 33,2%-ით შემცირდა იმიგრანტების რიცხვი. ამ ფონზე 25%-ით გაიზარდა რუსეთიდან ემიგრირებულთა რაოდენობა. 2022 წელს რუსეთმა უკრაინის წინააღმდეგ ფართომასშტაბიანი ომი დაიწყო.
თურქეთის სტატისტიკის ინსტიტუტის მონაცემებით, 2022 წელს რუსი იმიგრანტების რაოდენობა იყო 99 786, რაც უცხო ქვეყნების მოქალაქეებს შორის ყველაზე მაღალი მაჩვენებელია. მეორე ადგილზეა უკრაინა(8,1%). პირველ ხუთეულში არიან ირანი(6,5%), ავღანეთი(5,4%) და ერაყი(4,8%).
2022 წელს, წინა წელთან შედარებით, 77%-ით გაიზარდა რიცხვი რუსეთის იმ მოქალაქეების, რომლებმაც თურქეთში ბინადრობის უფლება მიიღეს. იმიგრანტების დიდი ნაწილი საცხოვრებლად უპირატესობას ანიჭებს ქალაქ სტამბოლს.