"ფულს არ ვითხოვთ, ომის დროს დაზიანებული სახლები შეგვიკეთონ" - ომბუდსმენი გუგუტიანთკარელებს შეხვდა
საქართველოს სახალხო დამცველი საოკუპაციო გამყოფ ხაზთან, სოფელ გუგუტიანთკარში, ადგილობრივ მოსახლეობას შეხვდა და ხელისუფლებას ომით დაზარალებული ადამიანებისადმი მეტი ყურადღების გამოჩენისკენ მოუწოდა. ლევან იოსელიანის თქმით, აგვისტოს ომიდან 15 წლის შემდეგაც კი გრძელდება უკანონო ე.წ. ბორდერიზაცია და ომის შედეგებს დღემდე მწვავედ განიცდის ოკუპირებულ ტერიტორიაზე დარჩენილი და გამყოფი ხაზის მიმდებარედ მცხოვრები მოსახლეობა.
„აქ მეუბნებიან, რომ დამწვარი სახლების მფლობელებმა 2008 წელს მიიღეს კომპენსაცია. ჩემი აზრით, ეს არ არის საკმარისი საბაბი იმისთვის, რომ დღეს ეს სახლები ასე იყოს დამწვარი და ამ ხალხზე არავინ ზრუნავდეს და თვითონ შეკედლებულნი იყვნენ რომელიღაც საჯარო დაწესებულებას. სახელმწიფომ მეტი ყურადღება უნდა მიაქციოს ამ ადამიანებს, რომლებიც ყველაფრის მიუხედავად, აქ რჩებიან და აგრძელებენ ცხოვრებას“, - განაცხადა ლევან იოსელიანმა.
მოსახლეობა ომბუდსმენს ომის დროს დაზიანებული სახლების აღდგენის საჭიროებაზე ესაუბრა. მათი თქმით, მეზობელ სოფელ ზარდიანთკარში ეს პროცესი უკვე დაწყებულია, გუგუტიანთკარში კი კომისიაც არ შექმნილა.
„ომის დროს ბინა ძალიან დაზიანდა. ორ ოთახში არ იცხოვრება. არავის მოვუკითხივართ აქამდე. ფულს არ ვითხოვთ, ომის დროს დაზიანებული სახლები შეგვიკეთონ, როგორც ეს ზარდიანთკარში ხდება“,- ამბობს ელზა გუგუტიშვილი.
„ომის დროს „ბეტეერები“ დადიოდნენ, აფეთქებები იყო, ფანჯრები სულ ჩაიმსხვრა. სახურავი დაზიანებულია და წყალი ჩამოდის. ჩამოიარონ და შეამოწმონ, შექმნან კომისია, ისეთს განსაკუთრებულს ხომ არაფერს ვითხოვთ“, - ამბობს ჯულიეტა რაზმაძე.
ომის დროს სოფელ გუგუტიანთკარში 6 სახლი დაინგრა, სახლების ნაწილი კი დაზიანებულია. 2008 წლის შემდეგ სოფელში ე.წ. ბორდერიზაციის მეორე ტალღაც დაიწყო. 2019 წლის 7 აგვისტოს საოკუპაციო ძალებმა გუგუტიშვილების სახლები და მიწის ნაკვეთები საოკუპაციო ფარგლებში მოაქციეს, როცა საოკუპაციო ღობე რამდენიმე მეტრით სოფლის სიღრმეში გადმოწიეს. მთლიანად განადგურებულია მეზობელი სოფელი დისევი, სადაც ახლა საოკუპაციო ბაზაა განთავსებული.
დღეს, 7 აგვისტოს, 15 წელი შესრულდა 2008 წლის აგვისტოს 5-დღიანი ომის დაწყებიდან.
ომბუდსმენის აპარატის ინფორმაციით, 2008 წლის აგვისტოს საომარი მოქმედებების შედეგად იძულებით გადაადგილებული 27 582 პირია რეგისტრირებული. ომის დროს დაიღუპა თავდაცვის სამინისტროს 170 მოსამსახურე, 14 პოლიციელი, 224 სამოქალაქო პირი. დაჭრილ/დაშავებულ სამოქალაქო და სამხედრო პირთა რაოდენობა სულ შეადგენს 2232-ს.
2008 წლის აგვისტოს ომის შედეგად საქართველომ კონტროლი დაკარგა 189 სოფელზე, მათგან 125 დღემდე რუსეთის საოკუპაციო რეჟიმის ქვეშაა.